Dünyanın ən böyük bazar kapitallaşmasına malik kriptovalyutası olan "Bitcoin", 100 min dollar hədəfini aşaraq yeni tarixi rekorda imza atdı. Bu nailiyyət, son həftələrdəki çətinliklərdən sonra bazara olan inamı əhəmiyyətli dərəcədə artırdı. Eyni zamanda, bazar kapitallaşması 2 trilyon dollara çataraq 5,74% artım göstərdi.

Dekabrın 5-də "CoinMarketCap" məlumatlarına əsasən, "Bitcoin" qiyməti artmağa davam edərək 103,700 dollara çatdı və ticarət həcmi 33% artaraq 91 milyard dollara yüksəldi. Bazardakı ümumi əhval-ruhiyyə isə 80%-ə qədər müsbət olaraq qeyd olunur.

Müsbət xəbərlər bazara dəstək oldu

Qiymət artımı, ABŞ-ın keçmiş prezidenti Donald Tramp (Donald Trump) tərəfindən Pol Etkinsin (Paul Atkins) Qiymətli Kağızlar və Birjalar Komissiyasının (SEC) sədri vəzifəsinə namizəd göstərilməsi ilə dəstəkləndi. Bu xəbər bazarda müsbət təsir yaratdı. "Ripple" şirkətinin icraçı direktoru Bred Qarlinqhaus (Brad Garlinghouse) və konqresmen Tom Emmer də Etkinsin kriptovalyuta tərəfdarı mövqeyinə görə bu namizədliyi dəstəklədiklərini bildirdilər.

Eyni zamanda, Federal Ehtiyat Sisteminin (Fed) sədri Cerom Pauell (Jerome Powell) "Bitcoin"in qızılın rəqibi kimi qəbul edilməsini vurğulayaraq bu rəqəmsal aktivin təhlükəsiz investisiya vasitəsi kimi qəbul edildiyini təsdiqlədi.

"Bitcoin" üçün gələcək hədəflər

100 min dollarlıq hədəfə çatılmasına baxmayaraq, analitiklər və kriptovalyuta mütəxəssisləri "Bitcoin"in qiymətinin gələcəkdə daha da yüksələcəyinə inanırlar. Gələcək illər üçün yeni hədəf qiymətlər 150 min dollardan 500 min dollar arası dəyişir.

"Bernstein Research" analitikləri, 2025-ci ilə qədər "Bitcoin" üçün 200 min dollarlıq ambisiyalı bir qiymət proqnozu irəli sürüblər. Bu proqnoz, artan institusional tələbat səbəbindən əvvəlki 150 min dollarlıq proqnozdan yenilənmişdir.

"Cardano" qurucusu Çarlz Hoskinson (Charles Hoskinson) isə "Bitcoin"in qiymətinin iki il ərzində 250 min dollara qədər yüksələcəyini düşünür. O, bu hədəfi ən aşağı səviyyə kimi qiymətləndirir və maksimum səviyyənin 500 min dollara qədər çata biləcəyini hesab edir.

Rəhim