Kanadanın bir qrup xəbər və media şirkəti "OpenAI"ə qarşı məhkəmə iddiası qaldıraraq, "ChatGPT"nin yaradıcılarının onların müəllif hüquqlarını pozduğunu və bu yolla əsassız gəlir əldə etdiyini iddia edib.  

Valyuta.az "TechCrunch"a istinadən xəbər verir ki, məhkəmə iddiasını irəli sürən şirkətlər arasında "Toronto Star", Kanada Yayım Korporasiyası (CBC), "The Globe and Mail" və digər nüfuzlu qurumlar var. Şirkətlər maddi təzminat tələb edir və "OpenAI"nin onların işlərindən gələcəkdə istifadəsini qadağan etməyə çalışırlar.  

Şirkətlər bildirib ki, "OpenAI" onların vebsaytlarından götürülən məlumatları "ChatGPT"nin böyük dil modellərini hazırlamaq üçün istifadə edib. Onlar qeyd edir ki, bu məzmun "media şirkətlərinin, onların jurnalistlərinin, redaktorlarının və əməkdaşlarının böyük zaman, zəhmət və maliyyə sərfiyyatı ilə ərsəyə gətirilmiş məhsuludur."

Məhkəmə sənədlərində bildirilib: "Məlumatları qanuni şəkildə əldə etmək əvəzinə, "OpenAI" Media agentliklərinin qiymətli intellektual mülkiyyətini açıq şəkildə mənimsəyərək, onu öz istifadəsi, o cümlədən kommersiya məqsədləri üçün razılıq və ya qarşılıq olmadan çevirməyi seçib."  

"OpenAI" daha əvvəl "The New York Times", "New York Daily News", YouTube məzmun yaradıcıları və komediya ustası Sara Silverman (Sarah Silverman) daxil olmaqla, digər müəllif hüquqları iddiaları ilə də üzləşib.  

Hərçənd "OpenAI" "Associated Press", "Axel Springer" və "Le Monde" kimi nəşriyyatlarla lisenziya müqavilələri imzalayıb, bu yeni iddiada iştirak edən şirkətlər qeyd edir ki, onlar "OpenAI"dən işlərinə görə heç bir ödəniş və ya hər hansı qarşılıq almayıblar.  

"OpenAI" nümayəndəsi bəyanatında bildirib ki, "ChatGPT" “dünyada yüz milyonlarla insan tərəfindən gündəlik həyatlarını yaxşılaşdırmaq, yaradıcılığı təşviq etmək və çətin problemləri həll etmək üçün istifadə olunur.” Nümayəndə əlavə edib ki, şirkətin modelləri “ictimaiyyətə açıq məlumatlarla və ədalətli istifadə prinsipləri ilə uyğun olaraq, yaradıcıların hüquqlarını qoruyaraq və innovasiyaları dəstəkləyərək hazırlanır.”  

“Biz xəbər nəşriyyatları ilə sıx əməkdaşlıq edirik, o cümlədən "ChatGPT" axtarışında onların məzmununa istinadların və linklərin göstərilməsi üçün. Həmçinin onların məzmunlarının istifadəsindən asanlıqla imtina etmələri üçün yollar təklif edirik,” "OpenAI" nümayəndəsi əlavə edib.  

Bu məhkəmə iddiası, Kolumbiya Universitetinin Rəqəmsal Jurnalistika üzrə Tow Mərkəzinin apardığı bir tədqiqatın dərcindən sonra ortaya çıxıb. Tədqiqatda vurğulanıb ki, ""OpenAI" ilə əməkdaşlığının səviyyəsindən asılı olmayaraq, heç bir nəşriyyat "ChatGPT"də öz məzmununun yanlış təqdimatından xilas olmayıb."  

Rəhim