ABŞ-ın seçilmiş prezidenti Donald Trampın idxal rüsumları Britaniya şirkətlərini Avropa şirkətlərindən daha çox risk altında qoyur. 

Valyuta.az xəbər veri ki, bu barədə "Bloomberg" yazıb.

"McKinsey"nin Böyük Britaniya və İrlandiya tədqiqat və iqtisadiyyat direktoru Tera Allas deyib: "Birləşmiş Krallıq ixracatında ABŞ-ın payı bir çox sektorlarda əsas Avropa İttifaqı ölkələrindən üstündür".

Beləliklə, Birləşmiş Ştatlar Britaniya mallarının ixracının 15 sektorundan 9-u üzrə aparıcı yerdir. Müqayisə üçün, ABŞ yalnız dörd Alman sektoru və bir Fransa sektorunun əsas alıcısıdır.

London artıq Vaşinqtonun potensial tarif artımlarına cavab tədbirləri haqqında düşünməyə başlayıb. Bildirilir ki, Tramp xarici idxala 10-20% rüsum tətbiq edərsə, Böyük Britaniya bir sıra ABŞ mallarına tarifləri geri qaytarmağı planlaşdırır.

Qeyd edək ki, Donald Trampın 2025-ci ildə yeni prezidentlik dövründə idxal rüsumlarına dair planları iqtisadiyyatda ciddi dəyişikliklərə səbəb ola bilər. Bu siyasət ABŞ-ın daxili istehsalını gücləndirmək və xarici ticarətdən asılılığı azaltmaq məqsədi daşıyır. Tramp administrasiyası idxal olunan əksər məhsullara 10-20% ümumi rüsum tətbiq etməyi planlaşdırır. Xüsusilə Çin məhsulları üçün bu rəqəm 40%-ə qədər yüksələ bilər. Bu tariflər onun ilk prezidentliyi dövründə tətbiq olunan 7.5%-25% arası rüsumlarla müqayisədə daha yüksəkdir.

Çin məhsullarına tətbiq olunacaq 40%-lik rüsum, xüsusilə texnologiya, avtomobil hissələri və istehlak malları sahələrində idxalı bahalaşdıracaq və ABŞ istehsalçılarını qorumağı hədəfləyir. Eyni zamanda bu, Çin iqtisadiyyatının artım tempinə təzyiq göstərə bilər.

ABŞ Avropa İttifaqını və Meksikanı "ədalətsiz ticarət üstünlüyü"ndə ittiham edərək bu ölkələrdən idxal olunan məhsullara əlavə rüsumlar tətbiq etməyi də nəzərdən keçirir.

Tənqidçilər tariflərin istehlakçıların xərclərini artıracağını və qlobal ticarət əlaqələrinə mənfi təsir edəcəyini vurğulayır. Proqnozlara görə, bu siyasət ABŞ ailələri üçün illik 7,600 dollar əlavə xərclə nəticələnə bilər.

Ticarət nümayəndəsi kimi təcrübəli siyasətçi Robert Liqtizer Trampın bu tarif strategiyasını icra etməyə kömək edəcək. Bu, təkcə icra hakimiyyəti deyil, həm də Konqresin daha aktiv iştirakı ilə həyata keçirilə bilər.

Bu tarif siyasətləri, daxili istehsalı dəstəkləsə də, beynəlxalq ticarət əlaqələrində gərginliyi artıracağı və qlobal ticarət dinamikalarını dəyişdirəcəyi gözlənilir. 

Paşa Məmmədli