"Wall Street"in "S&P 500" (^GSPC) indeksinə dair ən yüksək proqnozu 2025-ci ilin sonuna qədər mövcud səviyyədən təxminən 17% artımı nəzərdə tutur.

Valyuta.Az "Yahoo Finance"a istinadən xəbər verir ki, Bazar ertəsi "Deutsche Bank"ın baş qlobal strateqi Binki Çadha "S&P 500" üçün 7,000 hədəfini açıqladı.

Proqnozunu izah edən Çadha, işsizlik səviyyəsinin aşağı salınması və iqtisadi artımın davamlılığını qoruması ilə xarakterizə olunan mövcud güclü makroiqtisadi vəziyyəti vurğulayıb.

"Fond bazarına olan güclü axınlar qismən dövri iqtisadi artımın korporativ gəlirlər və fond gəlirlərinə təsiri ilə bağlıdır", - deyə Çadha qeyd edib. "Bu axınlar həmçinin çox yüksək olan risk iştahının artması ilə əlaqələndirilir. Buna diqqət yetirmək vacibdir, lakin bizim fikrimizcə, işsizlik səviyyəsinin 4%-ə yaxın olduğu və ÜDM artımının 3% təşkil etdiyi bu nadir güclü şəraitdə risk iştahı yüksək olmalıdır. Tarixən bu vəziyyət yalnız 6% hallarda müşahidə edilib."

Çadha əlavə edib ki, oxşar iqtisadi şərait 1960-cı illər və 1990-cı illərin II yarısında müşahidə olunub və həmin dövrlərdə də fond bazarlarında güclü artımlar qeydə alınıb.

Sektor perspektivindən isə Çadha və digər strateqlər 2025-ci ildə bazarların növbəti mərhələsinin böyük texnologiya şirkətləri deyil, davam edən iqtisadi artımdan faydalana biləcək sahələr tərəfindən idarə ediləcəyini hesab edir. O, artımın 2025-ci ildə tədricən başqa sahələrə keçəcəyini və bu məqsədlə müəyyən dövri sektorlara üstünlük verdiyini vurğulayıb.

"Biz sektor səviyyəsində dövri sektorlara üstünlük veririk və bir çox müsbət amillərin təsir göstərdiyi maliyyə sahəsinə, istehlak mallarına və materiallar sektoruna daha çox diqqət yetiririk," - deyə Çadha bildirib.

2024-cü ildə iqtisadi yavaşlama əlamətlərinə diqqət yetirilsə də, Çadha və komandası kapital xərcləmələrinin texnologiya sahəsindən kənarda artması, korporativ inamın güclənməsi və birləşmə və satınalma (M&A) fəaliyyətinin artması kimi genişlənmə prosesinin müxtəlif aspektlərinin hələ qarşıda olduğunu hesab edir.

"ABŞ kapital bazarları və M&A fəaliyyəti biznes dövrü, inflyasiya, daxili siyasət və geopolitik məsələlərlə bağlı davamlı qeyri-müəyyənliklər fonunda aşağı səviyyədə olub," - Çadha bildirib. "Bununla yanaşı, əlverişsiz tənzimləmə mühiti də fəaliyyətləri yavaşladıb. Korporativ inamın artması və daha sadə tənzimləmə rejiminin yaranması M&A və kapital bazarlarında canlanmaya səbəb ola bilər."

Rəhim