ABŞ-ın Ohayo ştatında bir kilsə üçün hazırlanmış vitraj "Tiffany" pəncərəsi hərracda 12,48 milyon dollara satılıb.  

Valyut.Az "CNN"ə istinadən xəbər verir ki, "Danner Memorial Window" adlanan vitraj, Nyu-Yorkdakı "Sotheby’s" hərrac evində satışa çıxarıldıqda, təxmin edilən maksimum dəyərdən də 5 milyon dollar baha qiymətə satılıb.  

Hərrac 4,5 milyon dollardan başlayıb və altı dəqiqə yarım ərzində üç alıcı arasında qiymət artımı nəticəsində vitraj 5-7 milyon dollar arası gözlənilən qiyməti geridə qoyub.  

Hündürlüyü 16 fut (təxminən 4,9 metr) olan bu parlaq əsər məşhur rəssam Luis Komfort Tiffani (Louis Comfort Tiffany) - "Tiffany & Co." şirkətinin qurucusu Çarlz Luis Tiffaninin (Charles Lewis Tiffany) oğlu - və firmanın aparıcı dizaynerlərindən biri olan Aqnes Nortrop (Agnes Nortrop) arasında əməkdaşlıq nəticəsində hazırlanıb.  

Bu əsər rəngarəng bir mənzərəni təsvir edir: meyvələrlə dolu ağaclar, qıvrımlı çayın sahili, arxa fonunda isə gün batımı görünür. Ağacların dibində isə qırmızı lalələr diqqət çəkir.  

Vitraj son 24 il ərzində ilk dəfə olaraq hərraca çıxarılıb və bu satış "Tiffany Studios" üçün yeni bir rekord müəyyən edib. 2000-ci ildə bu vitraj 2 milyon dollara satılmış və həmin dövrdə "Tiffany" pəncərəsi üçün dünya rekordu hesab olunmuşdu.  

"Sotheby’s" hərrac evi, vitrajın 1903-cü ildə Aqnes Nortrop tərəfindən atası üçün Nyu-Yorkun Flushing şəhərindəki Reformed Kilsəsi üçün hazırlanan memorial pəncərənin tematik sələfi olduğunu bildirib.  

Bu vitraj isə Ohayo ştatının Canton şəhərindəki Birinci Baptist Kilsəsinin təsisçiləri olan Con və Teressa Dannerin (John and Teresa Danner) xatirəsinə ithaf edilib. Kilsə bu əsəri cütlüyün 50 illik xidmətlərini qeyd etmək üçün sifariş edib. Maraqlıdır ki, vitraj hazırlananda cütlük hələ sağ idi və əsəri görə bilmişdilər.  

Qeyd edək ki, bu əsər daha əvvəl milyarder incəsənət kolleksiyaçısı Alan Gerri (Alan Gerry) tərəfindən saxlanılırdı, lakin telefon vasitəsilə anonim alıcıya satılıb.  

Rəhim