"Apple" 2025-ci ildə süni intellekt dəstəkli yeni bir "ağıllı ev" cihazını elan etməyə hazırlaşır.

Valyuta.az "Bloomberg"ə istinadən xəbər verir ki, Mark Qurmanın bildirdiyinə əsasən, 2025-ci ilin mart ayında "iPhone" istehsalçısı divara quraşdırıla bilən, ağıllı ev cihazlarını idarə edən, video zənglər həyata keçirən və "Apple Intelligence" funksiyasını ehtiva edən yeni bir planşet təqdim edə bilər.

Bu cihazın 6 düymlük sensor ekranla təchiz olunduğu bildirilir. Lakin "HomePod" kimi əsasən səs vasitəsilə – Siri, "Apple Intelligence" və ya süni intellektə əsaslanan "App Intents" adlı yeni sistemlə - idarə ediləcəyi gözlənilir. Cihaz yaxınlıq sensorları ilə təchiz olunacaq və yeni bir əməliyyat sistemi üzərində işləyəcək. Bununla yanaşı, "Safari", "Apple Music", "Notes" və "Calendar" kimi ənənəvi "Apple" tətbiqlərini də əhatə edəcək.

"Apple"ın bu “ev üçün komanda mərkəzi”nin "Amazon"un "Echo Hub" və "Google"un "Nest Hub" modellərinə rəqib kimi nəzərdə tutulduğu görünür və qiymətinin 100-250 dollar aralığında olacağı ehtimal edilir. Bununla yanaşı, şirkət otaqda istifadəçini izləyə bilən robot qollu "iPad" üzərində də işləyir ki, bu cihazın qiymətinin 1000 dollara yaxın olması gözlənilir.

Rəhim