Apple (NASDAQ:AAPL)-ın dördüncü maliyyə rübünün nəticələri Wall Street-in gəlir və hər səhm üçün mənfəət gözləntilərini üstələsə də, şirkətin Avropada vergi qərarı çərçivəsində etdiyi birdəfəlik ödənişdən sonra xalis mənfəəti azalıb.

Valyuta.Az-ın verdiyi xəbərə görə, dördüncü rübdə gəlir 94,58 milyard dollar olan proqnozu aşaraq 94,93 milyard dollara çatıb. Düzəldilmiş hər səhm üçün mənfəət gözlənilən 1,60 dolları üstələyərək 1,64 dollar olub.

iPhone gəlirləri 6% artaraq iPhone 16-nın bazarda necə performans göstərəcəyi ilə bağlı ilk göstəriciləri ortaya qoyub. Apple CEO-su Tim Cook, iPhone 15-in satışlarının “əvvəlki rübdəki 14-dən daha güclü olduğunu və 16-nın da 15-dən daha güclü olduğunu” qeyd edib.

iPhone satışlarından əldə edilən gəlir 46,22 milyard dollar, Mac satışlarından gəlir 7,74 milyard dollar, iPad gəliri 6,95 milyard dollar, xidmət gəlirləri isə 24,97 milyard dollar təşkil edib.

Apple dördüncü rübdə 14,73 milyard dollar və ya hər səhm üçün 97 sent xalis gəlir əldə edib; bu göstərici əvvəlki rübdə 22,96 milyard dollar və ya hər səhm üçün 1,47 dollar idi. Apple-ın düzəldilmiş hər səhm üçün mənfəəti, birdəfəlik vergi yükü çıxıldıqdan sonra illik müqayisədə 12% artıb.

Apple mali il ərzində ümumi gəlirini 2% artıraraq 391,04 milyard dollara çatdırıb.

Aydın