Böyük Britaniyanın varlı sakinləri vergi siyasətinin gözlənilən sərtləşdirilməsi səbəbindən ölkəni aktiv şəkildə tərk etməyə başlayıblar. 

Valyuta.az xəbər verir ki, "Bloomberg" bu barədə 30-dan çox sərvət idarəçiliyi üzrə məsləhətçi və varlı şəxslərlə söhbətlərə istinadən yazıb.

Nəşrin məlumatına görə, maliyyə elitasının bəzi üzvləri artıq köçmək planlarını həyata keçirib, digərləri isə çıxış strategiyasını hazırlamaq mərhələsindədir. Londonu tərk etməyi düşünənlər arasında hedc fondunun yaradıcısı milyarder Alan Hovard da var. İyun ayında təqdim edilən sənədlərə görə, Britaniyanın özəl kapital sektorunun qabaqcıllarından biri olan Ceremi Koller artıq İsveçrəyə köçüb.

"İnsanlar sadəcə gedirlər. Beyin axını bir şeydir, amma sərvət axını tamamilə fərqli bir oyundur", deyə iki il Londonda qaldıqdan sonra Yunanıstana köçən nigeriyalı-livanlı sahibkar Bassim Haydar bildirib.

Kütləvi köçün səbəbi Leyboristlər Partiyasının ofşor sərvətlərinə 40% miras vergisi tətbiq etmək və daşınan faizlərə görə vergini 45%-ə çatdırmaq planları olub. Özəl kapital firması General Atlantic xəbərdarlıq edib ki, dəyişikliklər nəticəsində bəzi işçilər London ofisini tərk edə bilər.

"Henley & Partners"a görə, Böyük Britaniya bu il 9500 milyonçu itirə bilər - Çindən başqa hər hansı digər ölkədən çox. Bu, 2023-cü ildə gedənlərin sayından iki dəfə çoxdur.

Bəzi varlı sakinlər alternativ köçmə yerlərini nəzərdən keçirirlər. Varlı miqrantlara 15 il ərzində xaricdən əldə etdikləri gəlirlərə görə vergidən yayınmaq üçün birdəfəlik ödəmə imkanı təklif edən İtaliya populyar seçimə çevrilir. Fransız özəl kapital şirkəti "Astorg"un London komandasında on ildən çox işləmiş Fransua De Mitri bu yaxınlarda Milana köçüb.

Paşa Məmmədli