Aparıcı qlobal əmtəə treyderləri "Trafigura Group" və "Gunvor Group" neft bazarının perspektivləri ilə bağlı tutqun proqnozlar təqdim ediblər. 

Valyuta.az bu barədə "Bloomberg"ə istinadən xəbər verir.

Sinqapurda keçirilən Asiya-Sakit Okean Neft və Qaz Konfransında "Trafigura"nın qlobal neft rəhbəri Ben Lakok "Brent" markalı neftin qiymətinin nisbətən qısa müddətdə bir barel üçün 60 dollara enməsi ehtimalının olduğunu bildirib.

"Bu gün biz istehlak etdiyimizdən qat-qat çox neft istehsal edirik və bu balanssızlığın növbəti illərdə daha da pisləşəcəyi gözlənilir", deyə "Gunvor Group"un sədri Torbyorn Turnkvis bildirib.

Treyderlərin mənfi proqnozları Çin və ABŞ-da tələb, həmçinin OPEC+-dan kənar ölkələrdən artıq təkliflə bağlı narahatlıqlarla əlaqələndirilir. OPEC+ keçən həftə oktyabr ayından planlaşdırılan hasilat artımını təxirə salsa da, gələn il hasilatı artırmaq kimi uzunmüddətli hədəfinə sadiq qalır.

"Brent markalı neftin qiyməti iyulun əvvəlindən aşağı düşüb və bu ilin bütün qazanclarını silib", deyə Lakok bildirib.

Paşa Məmmədli