Çin Kanadadan kanola idxalı ilə bağlı bir il davam edən antidempinq araşdırmasına başladığını elan edib. 

Valyuta.az xəbər verir ki, bu barədə “Reuters” Çin Xalq Respublikasının Ticarət Nazirliyinin bəyanatına istinadən yazır.

Ekspertlər bu addımı Ottavanın Çinin elektromobilləri və digər məhsullarına tariflər tətbiq etmək planlarına cavab kimi qiymətləndirirlər.

Nazirliyin məlumatına görə, Kanada idxalının dempinqi ilə yerli sənayeyə dəyən faktiki zərər arasında səbəb-nəticə əlaqəsi mövcuddur. Bu, idxalın həcminin əhəmiyyətli dərəcədə artması və qiymətlərin aşağı düşməsi ilə bağlıdır.

2023-cü ildə dünyanın ən böyük yağlı toxum idxalçısı olan Çin, idxalın 94%-i Kanadadan olmaqla 3,72 milyard dollar dəyərində 5,5 milyon ton kolza alıb.

Çinin Ticarət Nazirliyinin sözçüsü bildirib ki, araşdırma Kanadanın ÜTT qaydalarını pozaraq həyata keçirdiyi ayrı-seçkilik tədbirlərindən "köklü şəkildə fərqlənir". Ottava ABŞ və Avropa İttifaqından nümunə götürərək, Çindən gətirilən elektrik avtomobillərinin idxalına 100%, Çindən idxal edilən polad və alüminiuma isə 25% rüsum tətbiq etməyi planlaşdırır.

Avqustun sonunda məlum olub ki, Çin Aİ-dən süd məhsullarının idxalı ilə bağlı anti-subsidiya araşdırmasına başlayıb. Ticarət mübahisəsi Çinin iyun ayında Avropadan donuz ətinə qarşı antidempinq araşdırmasına başlamasından və Aİ-nin Çinin elektrik avtomobillərinə tariflər tətbiq etməyi planlaşdırmasından sonra davam edir.

Paşa Məmmədli