Azərbaycanda çatdırılması mümkün olmayan və paylanılmayan göndərişlərin saxlanılması, açılması, satışı və məhv edilməsi halları “Poçt haqqında” qanunun 13-cü maddəsi ilə tənzimlənir.

Valyuta.az xəbər verir ki, bu barədə “APA-Economics”in sorğusuna cavab olaraq “Azərpoçt” MMC-dən bildirilib.

Hansı hallarda poçt göndərişinin çatdırılması mümkün hesab edilmir?

Məlumata görə, poçt göndərişinin üzərində ünvanın dəqiq olmadığı, silindiyi, pozulduğu, oxunmadığı və ya buna oxşar digər hallarda, eləcə də ünvan sahibi poçt göndərişini almaqdan imtina etdikdə poçt göndərişinin çatdırılması qeyri-mümkün hesab edilir.

Bununla belə, ünvanı dəqiqləşdirmək mümkün olmadıqda və ya ünvan sahibi poçt göndərişini almaqdan imtina etdikdə, poçt göndərişi çatdırılması mümkün olmayan göndəriş kimi göndəriciyə qaytarılmalıdır. Lakin göndərici də poçt göndərişini geri almaqdan imtina etdikdə belə göndərişlər paylanmayan poçt göndərişlərinə aid edilir.

Paylanmayan poçt göndərişlərinin saxlama müddəti (6 ay) başa çatdıqdan sonra məhkəmənin müvafiq qərarı ilə poçt göndərişinin içərisindəki əşyalar, mallar və pul vəsaitləri sahibsiz hesab edilir.

Sahibsiz əşyalar satıla bilərmi?

Sahibsiz hesab edilən poçt göndərişinin içərisində olan digər əşyalar göndəricinin və ünvan sahibinin şəxsi və ya kommersiya səciyyəli sirrinin məxfiliyinə xələl gətirmədiyi halda satışa çıxarılmalıdır. Poçt göndərişinin içərisində aşkar edilmiş nağd pul, həmçinin əşya və ya malların satışından əldə edilmiş vəsait çəkilmiş xərclər çıxılmaqla dövlət büdcəsinə köçürülür.

Paylanılmayan poçt göndərişlərinin açılmasını, satışını və məhv edilməsini poçt operatoru tərəfindən yaradılan və daim fəaliyyət göstərən xüsusi komissiya həyata keçirir.

Saxta kampaniyalara inanmayın!

Son zamanlar, “Azərpoçt” MMC adından onlayn platformalarda saxta kampaniyalar keçirilir və bildirilir ki, guya sahibsiz qalan bağlamalar çox cüzi və simvolik qiymətə satışa çıxarılıb. Təəssüf ki, bu kimi saxta kampaniyalar vasitəsilə də dələduzlar tərəfindən vətəndaşlar aldadılaraq, onların pul vəsaitləri mənimsənilir.

Son dövrlər “Azərpoçt” tərəfindən sahibsiz qalan malların satışa çıxarılması təşkil olunmayıb. Bunun üçün də vətəndaşlardan bu kimi məlumatlara qarşı diqqətli olmaları, onlara cəlb edici görünən hər bir məlumatı “Azərpoçt”un 169 Çağrı mərkəzi, eləcə də rəsmi sosial şəbəkə hesabları vasitəsilə dəqiqləşdirmələri xahiş olunur.