Ottavanın Çin elektrik avtomobilləri, polad və alüminium idxalına tariflər tətbiq etmək niyyəti fonunda Çin Kanadadan gələn kanola və kimyəvi məhsullara qarşı antidempinq araşdırmasına başlayır. 

Valyuta.az xəbər verir ki, bu barədə çərşənbə axşamı Çin Xalq Respublikasının Ticarət Nazirliyinin mətbuat xidməti məlumat yayıb.

"Son sənaye hesabatlarına görə, Kanada kanola toxumunun Çinə ixracı əhəmiyyətli dərəcədə artıb, [Kanada ixracatçıları] dempinqdə şübhəli bilinir. Çin ÜTT qaydalarına və müvafiq yerli qanun və qaydalara uyğun olaraq Kanadadan kolza idxalı ilə bağlı antidempinq araşdırmasına başlayacaq”, - məlumatda deyilir. 

Nazirliyin məlumatına görə, 2023-cü ildə Kanadadan Çinə kolza ixracının dəyəri 3,47 milyard dollar təşkil edib, daşınmaların həcmi illik müqayisədə 170% artıb. Eyni zamanda, Kanada kolzasının qiymətləri "düşməyə davam edir". "Çin, həmçinin Kanadanın müvafiq kimyəvi məhsulları ilə bağlı antidempinq araşdırması başladacaq", - agentlik, hansı məhsulların söz mövzusu olduğunu dəqiqləşdirmədən bildirib.

"Kanada Çindən idxal edilən mallara qarşı ayrı-seçkilik yaradan birtərəfli məhdudlaşdırıcı tədbirlər görüb", - nazirlik Ottavanın Çin məhsullarına tariflər tətbiq etmək planlarını şərh edərək deyib. Pekin buna qəti şəkildə qarşıdır və buna görə də ÜTT-nin mübahisələrin həlli mexanizmindən istifadə etməyi planlaşdırır.

Çin gömrük məlumatlarına görə, Kanada yanvar-iyul ayları ərzində Çinə 1,44 milyard dollar dəyərində 2,65 milyon ton kolza ixrac edib, Rusiya isə ikinci yerdədir (77,6 milyon dollar).

Avqustun 26-da Kanadanın baş naziri Castin Trüdo bəyan edib ki, ölkə hakimiyyəti tezliklə elektriklə işləyən avtomobillərin idxalına 100%, Çindən polad və alüminium idxalına isə 25% tariflər tətbiq edəcək. Çin Xarici İşlər Nazirliyinin sözçüsü Lin Jian bildirib ki, Ottavanın bu addımı iki ölkə arasında ticarət və iqtisadi əlaqələri korlaya bilər. O, kanadalıların hərəkətlərini "tipik proteksionist yanaşma" adlandırıb. 

Nicat