İspaniyanın bəzi bölgələrində ilin əvvəlindən ölkəni bürüyən şiddətli quraqlıq səbəbindən hovuzların su ilə doldurulması qadağan edilib. Bütün bunlar çox yüksək yay temperaturu fonunda - bəzən 40ºC-dən yuxarı temperaturda edilir.

Valyuta.az "Metro"ya istinadən xəbər verir ki, iqlim dəyişikliyi ilə əlaqədar olaraq, bütün Cənubi Avropada istilər güclənir, bunun nəticəsində, xüsusən də İspaniyanın Kastelon əyalətində tarixdə ən pis quraqlıq yaşanır. Ən çox təsirlənən şəhərlər arasında bəzi bölgələrdə səkkiz aydan çox yağış yağmadığı Toras, El Toro və Barrakas var.

Su anbarlarında suyun səviyyəsi dörddə bir azalıb ki, bu da sakinlər, qonaqlar, kənd təsərrüfatı və sənaye sahələrinin su istehlakında məhdudiyyətlərə səbəb olub.

Hər üç bələdiyyənin merləri ötən cümə günü birgə bəyanat dərc edərək sakinləri sudan məsuliyyətlə istifadə etməyə çağırıblar. 

Hovuzların doldurulmasına qadağa qoyulması ilə yanaşı, insanlar avtomobillərini yumamağa və bağlarını sulamamağa çağırılır. Eyni zamanda rəsmilər İspaniyada istirahət edən turistləri vəziyyət düzələnə qədər sudan məsuliyyətlə istifadə etməyə çağırıb.

Paşa Məmmədli