Rusiya prezidenti Vladimir Putin iqtisadi məsələlərlə bağlı görüş zamanı ölkədə rəqəmsal valyutaların və digər rəqəmsal aktivlərin tətbiqini müzakirə etməyi təklif edib. 

Valyuta.az bu barədə TASS-a istinadən xəbər verir.

Dövlət başçısı vurğulayıb ki, Rusiya rəhbərliyi müxtəlif rəqəmsal aktivlərdən istifadə üçün qanunvericilik bazası yaratmaq və şərait hazırlamaq anı qaçırmamalıdır. Eyni zamanda, söhbət onların həm Rusiya Federasiyası daxilində, həm də digər güclərlə ticarət prosesində istifadəsindən gedir.

"Bu (rəqəmsal valyutaların tətbiqi-red.) həqiqətən də, demək olar ki, bütün dünyada bizneslər, investorlar, vətəndaşlar tərəfindən getdikcə daha çox tələb olunan müasir iqtisadiyyatın çox dinamik, perspektivli istiqamətidir", deyə Putin bildirib.

O, həmçinin 2023-cü ilin avqustunda Rusiya Federasiyası Mərkəzi Bankı tərəfindən ölkədə rəqəmsal rubldan istifadəyə dair pilot layihə haqqında danışıb. Prezident qeyd edib ki, bu günə qədər vətəndaşlar bu valyutadan istifadə etməklə artıq 27 mindən çox köçürmə həyata keçiriblər. Bundan əlavə, layihə iştirakçıları müəyyən xidmətlər üçün yeddi min dəfə ödəyiblər.

"Rəqəmsal rubl platforması pilot proqramının bir hissəsi kimi səmərəliliyini və funksionallığını göstərdi", deyə dövlət başçısı vurğulayıb.

Paşa Məmmədli