Keçən il ümumi qlobal dövlət borcu 100 trilyon dollar həddi keçib.

Valyuta.az xəbər verir ki, bu barədə Dünya Bankı və Beynəlxalq Valyuta Fondunun məlumatlarında qeyd olunur.

Bildirilir ki, təşkilat ilin ortalarına qədər 2023-cü il üçün ÜDM məlumatlarını təqdim edən 178 ölkə haqqında məlumatları əldə edə bilib.

Qeyd olunur ki, birləşdirilmiş dövlət borcu mərkəzi hökumətlərin, regionların və bələdiyyələrin borcunu nəzərə alır. Belə ki, ötən il qlobal dövlət borcu 5,8% artaraq, 101 trilyon dolları keçib. Eyni zamanda, qlobal ÜDM nominal ifadədə 4,2% artaraq 105,4 trilyon dollara çatıb. Bu isə ümumi qlobal borcun ÜDM-ə nisbətinin əvvəlki ildəki 94,5%-dən 95,8%-ə çatmasına səbəb olub.

Qlobal iqtisadiyyatın 35,6%-ni təşkil edən ABŞ 37,5 trilyon dollarlıq ən yüksək milli borcla ilk yeri tutub. İkinci yerdə 14,9 trilyon dollar və ya qlobal ÜDM-in 14,1%-i milli borcla Çin qərarlaşıb. Son bir ildə hər iki ölkənin dövlət borcu müvafiq olaraq 6% və 8% artıb. Onların qlobal iqtisadiyyatdakı payı ABŞ üçün 0,8, Çin üçün isə 0,5 faiz bəndi artıb. Üçüncü yerdə isə 10,6 trilyon dollar və ya dünya ÜDM-inin 10,1%-i dövlət borcu ilə Yaponiya qərarlaşıb.

2023-cü ildə Böyük Britaniya, Fransa, İtaliya, Hindistan, Almaniya, Kanada, Braziliya və İspaniyanın dövlət borcu qlobal iqtisadiyyatın 1%-ni keçib. Adı çəkilən ölkələrin dövlət borcunun dünya ÜDM-ində ümumi payı 80,2 faiz təşkil edib.

© Yeniavaz