Ruzanna Bəşirova
    Xərclər üzrə konsultant 

Aylıq kredit məbləği az və faizsiz olduğu üçün yeni əşyalar almaq istəyirsiniz? O zaman gəlin məsələyə daha geniş prizmadan baxaq.

Əgər büdcəniz limitli, ehtiyaclarınız isə çoxdursa, o zaman ağıla ilk gələn metod hissəli ödəniş olur. Məbləğ az olduğu üçün ödənilən pul gözə görünmür və çox ağırlıq yaratmır. Amma istənilən halda o məbləğ bizim büdcəmizdən çıxır. 

Məbləğlər nə qədər az olsalar da, büdcəmiz də vahid və limitli olduğu üçün bəzən o balaca məbləğlər belə bizim üçün ağır yükə çevrilə bilər. Buna görə də gəlin alacağımız əşyaları aylıq ödənişləri ilə yanaşı, onların bizim həyatımızdakı funksionallığına da diqqət yetirək.

Əgər almaq istədiyimiz əşyalar həqiqətən bizim üçün lazımdırsa, vaciblik dərəcəsinə görə sıralayaq. Daha sonra bu əşyaların aylıq ödənişlərinə baxaraq bir aylıq gəlirimiz və digər xərclərimizlə birlikdə nə qədər ödəniş etmək imkanımızı qiymətləndirək.

Bizə lazım olan əşyaların bir neçəsinin hissəli ödənişini edə biliriksə və bu bizi artıq yükün altına salmırsa, bu zaman əşyaları almaqda problem yoxdur, ala bilərik.

Əşyalar bizə vacib və təcili lazım deyilsə, sadəcə bu əşyalarımızın da olmağını istəyiriksə, o zaman bu cür əşyalar üçün az-az pul yığmaqla bir müddətdən sonra da almaq olar.

Alacağımız əşyaların hissəli ödənişi zamanı əlavə faiz ödəməli olacağıqsa, bu zaman isə çalışıb əşyanın pulunu toplayaraq almaq daha məsləhətlidir.

Bəzən əşyaların vaciblik dərəcəsinə görə addım atmaq lazım olur. Əgər sizin işiniz noutbukdan keçir və sizin qəfildən noutbukunuz xarab olub və təcili almalısınızsa, bu zaman kiçik bir bazar araşdırması edib ən optimal variantı tapmaqda fayda var. Bəzən insanlar təcili lazım olan əşyalar üçün sürətli qərar verdikləri üçün maddi cəhədən ziyana düşürlər.