“Hər birimiz ölkə üzrə müxtəlif dələduz qruplar tərəfindən əhalinin etimadından sui istifadə edərək və ya bankın adından istifadə edərək fərdi məlumatların ələ keçirilməsi cəhdlərinə şahid oluruq”.

Valyuta.az xəbər verir ki, bunu 2023-cü ilin maliyyə nəticələri ilə bağlı keçirilən mətbuat konfransında “Kapital Bank”ın İdarə Heyətinin üzvlü, Baş Risk İnzibatçısı Cavid Mirzəyev deyib.

O bildirib ki, bank bu istiqamətdə daim monitorinq fəaliyyəti apararaq belə saxta məlumatlar yayan mənbələri aşkar edir və müvafiq qaydada bağlanması üçün tədbirlər həyata keçirir: "Məsələn, təkcə 2023-cü ildən bu günə kimi olan statistikaya baxsaq saxta məlumatlar yayaraq dələduzluq fəaliyyəti həyata keçirən 90-dan çox web-sayt, 800-dən çox isə sosial şəbəkə hesabı tərəfimizdən şikayət edilərək bağlanılıb.

Əgər kartlar üzrə dələduzluq əməliyyatlarının statistikasına baxsaq, 2023-cü ildə bu mövzuda alınan 4000-ə yaxın müraciətin 70%-i müştərilərin xeyrinə həll edilib, 30%-i isə, təəssüf ki, şəxsi məlumatlar müştəri tərəfindən ötürüldüyündən təmin edilməyib".