Bu gün, mayın 17-də Çinin Milli Statistika İdarəsi aprel ayı üçün ölkədə istehlak aktivliyi, investisiya və sənaye istehsalı ilə bağlı məlumatları açıqlayıb. 

Valyuta.az xəbər verir ki, pərakəndə istehlakçı satışları və investisiyalar üzrə məlumatlar gözləniləndən daha pis olub, sənaye istehsalı ilə bağlı məlumatlar isə analitiklərin gözləntilərini üstələyib. 

Pərakəndə satışlar keçən ilin aprel ayı ilə müqayisədə apreldə 2,3% artıb. Bu, "Reuters" tərəfindən sorğu edilən analitiklərin 3,8% proqnozundan az və mart ayındaki 3,1% artımdan aşağıdır.

Apreldə sənaye istehsalı keçən ilin aprel ayı ilə müqayisədə 6,7% artıb və 5,5% artım proqnozlaşdıran analitiklərin gözləntilərindən də çox olub. Mart ayında artım 4,5% təşkil edib. Yanvar-aprel ayları daxil olmaqla, əsas kapitala investisiyalar 4,2% artıb ki, bu da proqnozlardan 4,6% azdır. Əmlak investisiyaları ilin ilk dörd ayında 2023-cü ilin eyni dövrü ilə müqayisədə 9,8% azalıb.

Ekspertlər qeyd edirlər ki, Çinin daşınmaz əmlak bazarında uzun sürən böhran və ABŞ-la çətin ticarət münasibətləri fonunda Çində daxili istehlak hələlik bu mənfi amilləri kompensasiya edə və iqtisadiyyatın bərpası üçün kifayət qədər stimul verə bilməz. "Xarici ticarət siyasətindəki sürtüşmələr bu ixracyönümlü iqtisadiyyatın bərpası perspektivlərini əhəmiyyətli dərəcədə çətinləşdirir. Son nəticədə Çin öz daxili tələbini artırmalıdır", deyə "Bloomberg" "Standard Chartered" bankının Çin və Şimali Asiya üzrə baş iqtisadçısı Dinq Şuanqdan sitat gətirir.

Paşa Məmmədli