Dövlət Statistika Komitəsinin açıqladığı rəqəmlərə görə, xarici turistlərin keçirdiyi gecələmələrin 80,9 faizi Bakıda qeydə alınıb. Bu, o deməkdir ki, Azərbaycana gələn turistlərin 80,9 faizi Bakı şəhərinə üstünlük verirlər. Yəni, ölkəyə gələn hər 10 turistdən cəmi 2-si Bakıdan kənara, rayonlara gedir. Rayonlara daha üz tutulmasının müxtəlif səbəbləri var. Burada həm nəqliyyat məsələsi, həm də turistlərin istirahət etməsi və əylənməsi üçün lazım şərait məsələsi var.
Bəs turistlərin rayonlara üz tutmamasının səbəbi nədir? Turistlərin rayonlara üz tutması üçün orada yerləşən hotellər hansı işləri görməlidirlər?

Azərbaycan Hotellər və Restoranlar Assosiasiyasının İdarə Heyətinin sədri, Azərbaycan Ekoturizm Assosiasiyasının icraçı direktoru Samir Dübəndi deyir ki, regionları inkişaf etdirmək üçün dövlət müəyyən addımlar atır. Sürətli magistral yolların açılması, yol infrastrukturunun yaxşılaşdırılması, sürət qatarlarının fəaliyyətinin gücləndirilməsi kimi müxtəlif işlər görülüb: “Rayonlarda otellərin işinə təkan verilməsi lazımdır, onlar üçün daha əlverişli biznes şərait yaratmalıyıq. Regionlarımızın turizm potensialını açıqlamalıyıq. Bunun üçün həm təbii, həm də antropogen tipli resurslardan istifadə etməliyik. Təbiətimiz zəngindir, hər guşəsində ölkənin özünəməxsus hansısa abidə var. Təbii və antropogen resursların bəziləri YUNESKO-nun qeyri-maddi mədəni irs siyahısına salınıb. Bu nüansları önə çəkərək regionların turizm potensialını artırmaq olar”. 

“COP-29”-dan və Azərbaycanda 2024-cü ilin “Yaşıl dünya naminə həmrəylik ili” elan olunmasından irəli gələrək, turizimdə də daha çox ekoloji və davamlı olan turizm fəaliyyətinə diqqət yetiririk. Bunlar da daha çox rayonlarımıza şamil olunur. Bunları önə çıxarmalı və düşünməliyik ki, bu biznes sektorunu daha hansı yollar ilə inkişaf etdirə bilərik” – S.Dübəndi qeyd edib.

Bloger, turizm eksperti Azər İsmayılın fikirlərinə görə, rayonlardakı hotellər xarici və yerli tur operatorları ilə əməkdaşlıq edərək daha çox turist cəlb edə bilərlər:

“Tur şirkətləri daha çox turistin ölkəyə gəlməsini təmin edir. Onlar turistləri rayondakı hotellərə yönləndirə bilərlər. Burada daha çox iş Dövlət Turizm Agentliyinin və Azərbaycan Turizm Bürosunun üzərinə düşür. Marketinq və tanıtım işlərini onlar görürlər. Xarici turistlər regionlarımızın turizm imkanlarını tanıdıqca rayonlara səyahət etməyə başlayacaqlar. Düzdür, Turizm Bürosu və Turizm Agentliyi tez-tez xarici ölkələrdə sərgilər keçirir. Bu sərgilər həm Bakıya, həm də digər regionlara gələn turist sayını artırır. Bu sərgilərdə, xarici mediada aktiv olaraq, reklam çarxlar hazırlayaraq və xarici blogerləri Azərbaycana dəvət edərək tanıtım işləri çoxaldıla bilər”.

Əvəz Həsənov