Almaniyanın tikinti materialları istehsalçısı "Knauf" şirkətin işğal olunmuş Mariupolda tikinti işlərində iştirakı məlum olduqdan sonra Rusiyanı tərk etmək və Rusiya biznesini yerli rəhbərliyə təhvil vermək niyyətində olduğunu açıqlayıb.

Valyuta.az xəbər verir ki, bu barədə "The Moscow Times" məlumat yayıb.

"Mövcud hadisələrin fonunda "Knauf Group" 30 ildən çox fəaliyyət göstərdikdən sonra Rusiyadakı biznesindən imtina etmək qərarına gəlib", deyə şirkətin açıqlamasında bildirilir.

Aprelin əvvəlində "ARD Monitor" jurnalistləri "Knauf"un 2022-ci ilin yazında Rusiya ordusu tərəfindən ələ keçirilən Mariupolda tikintidə iştirakı ilə bağlı araşdırma dərc etmişdilər. Mariupola sement tədarük etməklə yanaşı, "Knauf" Rusiya Federasiyası Müdafiə Nazirliyinin sifarişi ilə tikilən yaşayış binasının tikintisində də iştirak edib. Şirkət özü Rusiyanın Ukraynaya qarşı müharibəsini pislədiyini və Aİ-nin bütün sanksiyalarına sadiq qaldığını bəyan edib. "Rusiyada istehsal olunan "Knauf" məhsulları yalnız Rusiya bazarı üçün nəzərdə tutulub", deyə şirkət vurğulayır.

Eyni zamanda, Bundestaq "Knauf"u “işğal olunmuş rayonlarda (Ukraynanın-red.), xüsusən də Mariupolda Rusiyanın gücünü möhkəmləndirməkdə” ittiham edib. "Tikinti materialları, ümumiyyətlə, Aİ sanksiyalarına məruz qalmasa belə, şirkət bilməlidir ki, müharibənin aparılmasına dolayısı ilə kömək edir", sanksiya hüququ üzrə ekspert Viktor Vinkler bildirib.

"Knauf" Rusiyadakı ilk aktivini 1993-cü ildə əldə edib. Bunlar Krasnoqorskdakı istilik izolyasiyası və gips məhsulları zavodunun payları idi. Lakin hələ 1970-ci illərdə şirkətin təsisçiləri bəzi sovet alimləri və institutları ilə təcrübə mübadiləsi aparıblar.

Paşa Məmmədli