Avropa İttifaqı sanksiya siyahısında olan şəxslərin Aİ ölkələrinə səyahətinə, eləcə də sanksiyaya məruz qalan malların ticarətinə qoyulan qadağadan yayınmağa yardımı cinayətlər siyahısına daxil edib. 

Valyuta.az xəbər verir ki, bu barədə Aİ Şurasının mətbuat xidməti məlumat yayıb.

"Bu gün Şura üzv dövlətlərdə Aİ sanksiyalarının pozulması və ya yayınma hallarının təqibi üçün ümumavropa minimum qaydalarını əhatə edən qanunvericilik aktını qəbul etdi. İndi müəyyən əməllər bütün Aİ-nin üzv dövlətlərində cinayət sayılacaq, məsələn, səyahət qadağasından yan keçməyə kömək etmək, sanksiyaya məruz qalan mallar və ya qadağan olunmuş maliyyə fəaliyyətinin həyata keçirilməsinə yardım buna aiddir", deyə Aİ Şurasının sənədində qeyd edilir.

İzah olunur ki, üzv dövlətlər Aİ sanksiyalarının pozulmasının cinayətdən asılı olaraq dəyişən təsirli və mütənasib cinayət cəzaları ilə cəzalandırılmasını təmin etməlidir: "Lakin sanksiyaların qəsdən pozulması maksimum cəza kimi həbslə nəticələnməlidir. Aİ-nin məhdudlaşdırıcı tədbirlərini pozanlar əlavə cərimələrə məruz qala bilərlər".

Bundan əlavə, cinayət təşkilatda rəhbər vəzifə tutan şəxs tərəfindən törədildikdə hüquqi şəxslər də məsuliyyətə cəlb oluna bilər: "Belə hallarda sanksiyalara sahibkarlıq fəaliyyətinin dayandırılması və iqtisadi fəaliyyətlə məşğul olmaq üçün verilən icazələrin ləğvi daxil ola bilər".

Paşa Məmmədli