Macarıstanın “Pakş” AES-in ilk enerji bloku avtomatik mühafizə sisteminin işə salınması ilə əlaqədar söndürülüb. 

Valyuta.az xəbər verir ki, bu barədə TASS Milli Nüvə Enerjisi Administrasiyasına istinadən yazır.

İkinci enerji bloku konstruktiv elementlərdən birinin nasazlığı səbəbindən azaldılmış gücdə işləyir. Hər iki hadisə martın 25-i səhər saatlarında baş verib.

Agentlik qeyd edib ki, birinci reaktorun bağlanmasının təhlükəsizlik və ətraf mühitə heç bir təsiri olmayıb. Uğursuzluğun səbəbi hələ müəyyən edilməyib, mütəxəssislər bunun üzərində işləyirlər. İkinci blok isə nasosla bağlı problemlərə görə müvəqqəti olaraq nominal 440 MVt əvəzinə 100 MVt gücündə işləyir.

Təmir artıq başlayıb və tamamlandıqdan sonra enerji bloku təhlükəsizliyə və ətraf mühitə təhlükə yaratmadan tam gücü ilə bərpa olunacaq.

Martın 27-də Macarıstanın xarici işlər və xarici iqtisadi əlaqələr naziri Peter Szijarto “Pakş 2” atom elektrik stansiyasının tikintisinin gecikdirilməsini şayiələr adlandırıb. O, bu layihənin icrasının iki il təxirə salınması ilə bağlı yayılan məlumatlara belə cavab verib.

Szijarto həmçinin xatırladıb ki, 2023-cü ilin avqustunda iki yeni nüvə enerji blokunun faktiki tikintisinə başlanılıb. Artıq bünövrə çuxurunu qrunt sularından qorumaq üçün sızma əleyhinə pərdə quraşdırılıb, beşinci və altıncı bloklar üçün ərazidə qruntun möhkəmləndirilməsi işləri aparılır. Hazırkı plana görə, ilk beton 2025-ci ilin əvvəlində, bəlkə də bu ilin sonunda töküləcək.

Nicat