Uzun sürən istirahət günlərindən sonra bəzi işçilər işləməkdə çətinlik çəkirlər. Bu işçilər istirahət günlərinin çox olmasını istəmir ki, işdən kənar qalmasınlar. 

İstirahət günlərindən sonra işə qarşı həvəs müəyyən qədər aşağı düşür. Ümumiyyətlə, istirahətdən qayıdandan sonra işçilərin işə adaptasiya olması üçün nə qədər vaxt lazımıdır?

Bu barədə Valyuta.az-a danışan HR Hunter şirkətinin qurucusu, İnsan Resursları üzrə konsultant İlkin Mirzəzadə bildirib ki, Azərbaycan istirahət günlərinin sayına görə dünyada ilk beşlikdədir. Bu da inkişafda olan ölkə üçün çox pis göstəricidir. Normalda bayramlar maksimum iki gün olmalı və əsas bayramlar qeyd edilməlidir:

“Bizdə isə həddindən artıq çox olduğu üçün bu, həm işçiyə, həm də işəgötürənə çox ziyan vurur. İşçi cəhətdən düşünülə bilər ki, istirahət günləri çoxdur, produktiv olacaq, istirahət edəcək, amma istirahət günlərində də insan çox pul xərcləməyə məhkum olur. İşdən tamamilə uzaqlaşdığı üçün istər-istəməz passivlik yaranır. İşə geri qayında zaman da adaptasiya olmağa çətinlik çəkirlər. İşəgötürən tərəfdən də müəyyən mənfi cəhətləri var. Pul vəsaitinin itirilməsi, dövriyyə cəhətdən itirilmə olur, ölkə cəhətdən də problem olur ki, şirkətin bu qədər işləməməsi pulun vergi şəklində geri qaytarılması nisbətən çətinləşir”. 

Konsultant deyir ki, işçilərin işə adaptasiya olması üçün ən az iki-üç gün vaxt lazımdır:

“Bu iki-üç gün ərzində istirahətdən qayıdan kimi işçinin özünü çox yükləməsi doğru deyil. Yavaş-yavaş, mərhələ-mərhələ işləri yerinə yetirmək lazımdır. Çünki, insanın ağılı istirahətdə qalır, təmiz beyinlə işə başlayır. Buna görə də iki-üç gün özünə müəyyən tapşırıqlar verməlidir, onları bölməli və idarə etməlidir, havada daha çox gəzməli və yuxu rejiminə diqqət yetirməlidir. Adaptasiya müddəti bitdikdən, yəni iki-üç gün vaxt keçəndən sonra artıq normal iş rejiminə tam şəkildə qayıdacaq və heç bir problem olmayacaq”.

Əvəz Həsənov