Ukrayna Avropa İttifaqı ilə 6 milyard avroluq kredit sazişi imzalayıb və müvafiq memorandum imzalayıb. 

Valyuta.az xəbər verir ki, bu barədə Ukrayna Milli Bankının (NBU) mətbuat xidməti "Telegram" kanalında məlumat yayıb.

"Bu gün NBU-nun rəhbəri Andrey Pışnı baş nazirin birinci müavini, iqtisadiyyat naziri Yuliya Sviridenko və maliyyə naziri Sergey Marçenko ilə birlikdə Ukrayna ilə Aİ arasında anlaşma memorandumu, habelə müvafiq kredit sazişi imzalayıb", deyə bildirilib. 

NBU-ya görə, Ukrayna indi dövlət büdcəsinin cari ehtiyaclarını ödəmək üçün 6 milyard avroya qədər qısamüddətli maliyyə yardımına arxalana bilər.

Tənzimləyici qeyd edib ki, memorandumda nəzərdə tutulan şərtlər yerinə yetirildiyi təqdirdə 4,5 milyard avro məbləğində birinci tranş martda, ikinci tranş isə apreldə 1,5 milyard avro həcmində ayrılacaq. Kredit güzəştli şərtlərlə verilir, maksimum ödəmə müddəti 35 il və əsas borcun qaytarılmasına tranşın MBU-nun hesabına daxil olmasından 10 il sonra başlanır.

Ukraynanın baş naziri Denis Şmıqal martın 8-də bəyan edib ki, hökumət Avropa İttifaqından 6 milyard avro dəyərində kredit almaq üçün lazımi sənədləri təsdiqləyib. O qeyd edib ki, bu il Kiyev Aİ-dən cəmi 16 milyard avro almağı planlaşdırır.

Bundan əvvəl Avropa Komissiyasının sədr müavini Valdis Dombrovskis Kiyevə səfəri zamanı AK-nın Ukraynaya martda 4,5 milyard avro, apreldə isə 1,5 milyard avro yardım ayırmaq niyyətini açıqlamışdı. O, bu yardımın Avropa Komissiyasının Ukrayna hökuməti ilə birlikdə işlədiyi islahat və transformasiya planının həyata keçirilməsi şərti ilə veriləcəyini vurğulayıb.

Paşa Məmmədli