Kiyevin 80 min ton enerji tədarükü tələbinə cavab olaraq Avstraliya Ukraynaya öz kömürünü göndərməyəcək. 

Valyuta.az xəbər verir ki, bu barədə Avstraliya hökumətinin başçısı Entoni Albanese bildirib.

Baş nazirin sözlərinə görə, Avstraliya öz kömürünü Kiyevə göndərməyəcək, çünki “Ukrayna çox uzaqdadır və enerji resurslarını daha yaxından tapa bilər”. Albanese 3AW radiostansiyasına deyib: "Ukraynaya daha yaxın olan kömür var ki, ondan Avstraliyadan daşınmaq əvəzinə istifadə etmək olar. Bu reallıqdır. Biz çox uzaqlardayıq və kömürümüz şimala ən yaxın qonşularımız olan Çin və Hindistana ixrac olunur". 

Avstraliyanın baş naziri həmçinin xatırladıb ki, Kanberra, hətta kömür göndərməsə də, “NATO üzvü olmayan ölkələrdən Ukraynaya ən böyük donorlardan biridir”. “Biz bu yaxınlarda 50 milyon Avstraliya dolları [təxminən 32,5 milyon dollar] məbləğində yeni yardım paketi elan etdik və onlar [Ukraynalılar] bu məbləğdən silah və ya enerji almaq üçün istifadə edə bilərlər”, - o yekunlaşdırıb.

Bundan əvvəl Avstraliya Ukraynaya silah alınması üçün yeni maliyyə yardımı paketinin ayrıldığını açıqlamışdı. Daha 50 milyon Avstraliya dolları göndərildikdən sonra Kanberranın Kiyevə yardım üçün göndərdiyi vəsaitin ümumi məbləği 960 milyon Avstraliya dollarını (625 milyon dollar) ötüb. Bunun 780 milyon Avstraliya dollarından çoxu (təxminən 510 milyon dollar) bilavasitə silah və sursatların alınmasına xərclənib. Bundan əlavə, Avstraliya Ukraynaya 120 “Bushmaster” zirehli transportyoru, M777 haubitsaları, M113 zirehli texnikası, tank əleyhinə və digər silahlar, habelə pilotsuz uçuş aparatlarının partiyası göndərib.

Nicat