Bakı Dövlət Universiteti (BDU) 952 092,43 AZN dəyərində invertar və “müxtəlif” mallar alır. 

Valyuta.az xəbər verir ki, BDU bununla bağlı “Koneks Construction” MMC ilə satınalma müqaviləsi imzalayacaq. 

“Koneks Construction” MMC-nin 27 noyabr 2019-cu ildə qeydiyyata alındığı göstərilir. Şirkətin nizamnamə kapitalı 10 AZN-dir. Hüquqi ünvanı Bakı şəhəri Binəqədi rayonu, Səttar Bəhlulzadə küçəsi, ev 39, mənzil 29-da yerləşən MMC-nin qanuni təmsilçisi Osmanlı Vahid Cuma oğludur.

“Koneks Construction” MMC dövlət satınalmalarında fəal iştirak edir və adətən iri məbləğli tenderlərin qalibi seçilir. 

Şirkətin əsas fəaliyyəti təmir-tikinti sahəsini əhatə edir. Bu, “Koneks Construction” MMC-nin qalib gəldiyi tenderlərdən də görünür. 

Məsələn, fevralın əvvəlində dövlət satınalmalarının vahid elektron portalına yerləşdirilən məlumatdan aydın olur ki, “Konkes Construction” MMC İqtisad Universitetinin Zaqatala filialının yataqxana və idman binasının əsaslı təmir işlərinin satınalınması ilə bağlı keçirdiyi tenderin qalibi seçilib.. 
Şirkətin təklifi 4 224 357,88 AZN olub. 

Ötən ilin dekabrınd yerləşidirlən məlumatda isə şirkətin Bakı Şəhər İcra Hakimiyyətinin tabeliyində fəaliyyət göstərən “Bakı Şəhər Əsaslı Tikinti və Təmir” MMC-nin Bakı şəhəri ərazisində səkilərdə təmir işlərinin satın alınması ilə bağlı keçirdiyi tenderdə qalib gəlib. Bu tender üzrə satınalma müqaviləsinin maliyyə dəyəri 287 541,23 AZN-dir.

Dekabr ayında yerləşdirilən başqa bir məlumat isə şirkətin Yasamal Rayon Mənzil-Kommunal Təsərrüfatı Birliyinin məhəllədaxili yollarda təmir işlərinin satın alınması ilə bağlı keçirdiyi müsabiqədə qalib seçilib. Şirkətin təklifi 387 165,87 AZN olub. 

“Koneks Construction” MMC-nin təmir və tikinti işləri ilə əlaqədar keçirilən tenderlərdə qalib gəlməsinə dair onlarla belə fakt var. 
Açıq mənbələrdə şirkət haqqında heç bir məlumata rast gəlinmədiyindən onun maddi-texniki bazası ilə bağlı bir söz demək mümkün deyil. Şirkətin heç əlaqə nömrəsi və veb-səhifəsi də yoxdur. 

Hüseyn