1904-cü ildə müəmmalı şəkildə yoxa çıxan “SS Nemesis” kömür gəmisi 120 il sonra Avstraliya sahillərində tapılıb.

Valyuta.az xəbər verir ki, gəminin qalıqlarının onun itmiş yükünü axtaran şirkət tərəfindən təsadüfən okeanın dibində tapıldığı bildirilib.

“SS Nemesis” və 32 ekipajı 9 iyul 1904-cü ildə Böyük Britaniyanın Nyukasl şəhərindən kömürlə yüklənmiş halda yola çıxıb. Ancaq təyinat yeri Melburn olan 73 metr uzunluğundakı nəqliyyat vasitəsi səyahət zamanı itib. O, sonuncu dəfə Sidneyin cənubundakı Vollonqonq şəhərinin sahillərində dalğalarla mübarizə apararkən görülüb. Sonrakı həftələrdə gəmidə olan bəzi avstraliyalı, britaniyalı və kanadalı heyət üzvlərinin cəsədləri batan gəminin parçaları ilə birlikdə sahilə çıxıb. O dövrdə ictimai marağın güclü olmasına baxmayaraq, “SS Nemesis”in qalıqlarını tapmaq mümkün olmayıb. Lakin 2022-ci ildə Sidney sahillərində itirilmiş yük konteynerlərini axtaran şirkət okeanın dibində gəminin qalıqları ilə qarşılaşıb.

“SS Nemesis”in sahildən 26 kilometr aralıda və 160 metr dərinlikdə batdığı qeydə alınıb. Elmi və Sənaye Tədqiqat Təşkilatı (CSIRO) köhnə fotoşəkilləri və ağır zədələnmiş gəminin çertyojlarını su altında çəkilmiş fotolarla müqayisə edərək qalıqların məhz “SS Nemesis”ə aid olduğunu təsdiqləyib. Kəşfiyyatı həyata keçirən şirkətin baş meneceri Ed Korber açıqlamasında, “Bu gəmini tapmaq böyük şərəfdir. Nəhayət, itkin düşmüş ekipajın ailələrinə daha dəqiq məlumatlar çatdırıla biləcək”.

Elmir