Praqada Avropa İttifaqının kənd təsərrüfatı siyasətlərinə qarşı təşkil edilən fermer etirazları Rusiya tərəfdarları tərəfindən sanksiyalaşdırılır. 

Valyuta.az xəbər verir ki, bu barədə Çexiyanın baş naziri Petr Fiala X sosial şəbəkəsində bildirib.

Onun fikrincə, hazırkı nümayişin fermerlərin şəraitinin yaxşılaşdırılması uğrunda mübarizə ilə heç bir əlaqəsi yoxdur.

"Nümayiş, məsələn, Kremlə dəstək olduqlarını gizlətməyən və fermerlərin maraqlarından başqa məqsədlər güdən insanlar tərəfindən keçirilir", deyə Fiala yazıb.

Bir gün əvvəl Çexiyanın “Novinky” nəşri polisə istinadən xəbər vermişdi ki, fermerlərin etiraz aksiyası üçün 500-ə yaxın kənd təsərrüfatı texnikası Çexiyanın paytaxtına gedir.

Bundan əvvəl Polşanın Vrotslav şəhərində fermerlər nümayiş zamanı Avropa Komissiyasının nümayəndəliyinə yumurta atmışdılar. Etirazçılar şəhərin mərkəzində AK binası yaxınlığında toplaşıblar. Aksiyada ən azı min nəfər iştirak edib. Onlar təkərləri yandırıb, fişəngləri partladıblar. Aksiya başlayandan bir neçə dəqiqə sonra təşkilatçılar onun başa çatdığını elan ediblər.

Paşa Məmmədli