Tütün məmulatlarının qeyri-qanuni ticarətinə qarşı mübarizə dövlətlərə 47,4 milyard dollar məbləğində əlavə vergi gəlirləri gətirə bilər.

Valyuta.az xəbər verir ki, bu barədə TASS Ümumdünya Səhiyyə Təşkilatının (ÜST) press-relizinə istinadən yazır.

Təşkilatın məlumatına görə, hazırda qeyri-qanuni ticarət qlobal tütün bazarının 11%-ni təşkil edir.

Fevralın 12-dən 14-dək Panamada keçirilən Tütün məmulatlarının qeyri-qanuni ticarətinin ləğvi üzrə Protokol Tərəflərinin İclasının üçüncü sessiyasında bu fenomenlə mübarizə üçün qəti tədbirlər görülüb. Sessiya iştirakçıları Protokolun icrası və səhiyyə proqramlarının maliyyələşdirilməsi ilə bağlı mühüm məsələləri müzakirə ediblər. ÜST hesab edir ki, qeyri-qanuni ticarətin aradan qaldırılması hər il qlobal vergi gəlirlərinə 47,4 milyard dollar gətirəcək.

Sessiya zamanı hökumətləri tütünün qeyri-qanuni ticarətinin qarşısını almaq üçün səyləri artırmağa və tütün sənayesinin təzyiqinə tab gətirməməyə çağıran Panama Bəyannaməsi qəbul edilib. ÜST-nin Tütünlə Mübarizə üzrə Çərçivə Konvensiyasının katibliyinin rəhbəri sessiyada tütünlə bağlı izlənmə sistemlərinin və bu sahədə tədqiqatların təkmilləşdirilməsinə yönəlmiş mühüm qərarları qeyd edib.

2018-ci ildə qüvvəyə minən protokol ölkələrin birgə səyləri ilə tütün məmulatlarının qeyri-qanuni ticarətini tamamilə aradan qaldırmaq məqsədi daşıyır. 

Nicat