Yayda məşhur futbolçuları astronomik qiymətlərə alan Səudiyyə Ərəbistanı klubları bu ənənəni davam etdirməkdə maraqlıdır. 

Valyuta.az xəbər verir ki, ulduz futbolçuları yüksək məbləğ qarşılığında heyətlərinə qatan ərəblər futbolda yeni “maliyyə fırtınası” yaratmışdı. Hətta hazırda Avropada çıxışını davam etdirən bir çox aparıcı futbolçulara da cəlbedici təkliflər göndərən, ancaq istədikləri cavabı ala bilməyən klublar görünür bu məsələdə inadkarlıqlarından əl çəkməyəcəklər. Belə ki, ərəb klubları yenidən böyük pullar qarşılığında qalan məşhur ulduzları da ələ keçirmək niyyətindədir. 

Ərəblər təxminən 2,5 milyard avro xərcləməyə hazırlaşdıqları üçün “Mançester Siti”dən belçikalı Kevin De Bruyne, “Liverpul”dan misirli Mohamed Salah və “Tottenhem”dən cənubi koreyalı Son Henq-Mini hələ yaya fasiləsində transfer etmək istəyirdilər. 

Xarici KİV-lərin birindəki hesabata görə liqaya daha böyük adları cəlb etmək istəyən Yaxın Şərq klubları üçün hazırda ən vacib hədəflər yenə “Mançester Siti”, “Liverpul” və “Tottenhem”in ulduzlarıdır. Ərəblər ötən mövsüm Salahı “Liverpul”dan almağa çalışsa da Premyer Liqa təmsilçisi futbolçusunu satmaqdan imtina etmişdi. Həmçinin De Bruyne bu mövsümün əvvəlində mümkün transfer kimi diqqət mərkəzində idi. 

Səudiyyə Ərəbistanı Pro Liqasının hazırkı çempionu “Al-İttihad” keçən yay Salah üçün 150 milyon funt-sterlinq təklif etsə də, “Liverpul” onu buraxmadı. Misirli ulduz hazırda Premyer Liqanın geridə qalan 20 turu ərzində vurduğu 14 qolla, Yurgen Kloppun komandası üçün həlledici oyunçu olmaqda davam edir. Ancaq ərəb menecerlər 31 yaşlı futbolçunu öz klublarına cəlb edə biləcəklərinə inanırlar və bu səbəbdən onu diqqətdə saxlayırlar.

De Bruyne də Səudiyyə Ərəbistanı çempuionatı üçün ən çətin transfer hədəflərindən biridir. Mövsümün ilk oyununda zədələnən belçikalı bir müddət öncə komandaya qayıdıb. Onun da Salah kimi müqaviləsi 2025-ci ilə qədərdir, lakin Qvardiola bu müddəti uzatmaqda maraqlıdır. Nəticə etibarı ilə, “Mançester Siti”, şübhəsiz, böyük bir ödəniş tələb edəcək. Son Henq-Minin ərəb ölkəsinə yollanmasının qarşısını isə “Tottenhem” almışdı. 

Buna baxmayaraq, Kriştiano Ronaldo, Kərim Benzema və Neymar kimi ulduzları almağa nail olan ərəb klublarının növbəti yay transfer pəncərəsində yeni məşhur adlar üçün daha 2,5 milyard avro xərcləməyə hazır olduğu bildirilir.

Elmir