Bu ildən Azərbaycanda muzdlu işçilərinin orta aylıq sayı 3-dən az olan və məcburi dövlət sosial sığorta haqları üzrə borcu olan mikro sahibkarlar gəlirlərinin 5 faizi qədər deyil, 20 faizi qədər vergi ödəməyə başlayıblar. Yəni mikro sahibkarlar üçün 75 faizlik güzəşt ləğv edilib. Sahibkarlar narahat olmağa başlayıblar, bu prosesin heç də sərfəli olmadığı haqqında paylaşım edirlər. Bu proses ilin yekununda mikro sahibkarlara necə təsir edəcək?

İqtisadçı Natiq Cəfərli Valyuta.az-a açıqlamasında mikro sahibkarlara tətbiq olunan yüksək verginin ləğv edilməli olduğunu və bu qərarın dövlət büdcəsinə heç bir xeyiri olmayacağını, əksinə bir çox mikro sahibkarların işinin bağlanmasına, yaxud da boz sxemlərlə işləməyə məcbur olmasına gətirib çıxaracağını vurğuladı: “Bəzi mikro sahibkarlar var ki, ay ərzində cəmi 600-700 manat pul qazanırlar. Bunun 20 faizini vergi şəklində və təqribən 70 manat yaxın məbləğini də Sosial Müdafiə fonduna verməkləri onların işini mənasız edir. Nəinki 20 faiz, hətta 5 faiz də çoxdur. Bu vergini 2 faizə qədər endirmək mümkündür. Bu dövlət büdcəsinə heç bir ziyan gətirməyəcək, əksinə vətəndaşı mikrosahibkarlıq ilə məşğul olmağa sövq edəcək”.

İqtisadçı bizim mikro sahibkarların qonşu ölkələr ilə rəqabət apara bilməyəcəklərini də qeyd edib: “Gürcüstanda bu vergi bir faizdir. Gürcüstanda mikro sahibkarlar 1 faiz vergi ödəyirlər, Azərbaycanda bu rəqəm 20-dir. Bu, o deməkdir ki, Gürcüstanda eyni işi görən mikro sahibkar azərbaycanlı mikro sahibkara nisbətən öz məhsulunu bazara daha ucuz çıxaracaq və azərbaycanlı mikro sahibkar bundan ziyan görüb uduzacaq. Həm qonşu ölkələrdə daha aşağı olduğu üçün, həm də mikro sahibkarlığın inkişafı üçün bu qərar ləğv edilməlidir”.

Əvəz Həsənov