Bəzi işçilər il sonunda 12-ci ayın, yəni dekabr ayının maaşından əlavə 13-cü maaş da alırlar. Şirkətlərdə 13-cü maaş verilməsi bir dönəm aktuallığını itirsə də, bu il yenidən aktuallıq qazanıb. Əlbəttə, 13-cü maaş almaq hər kəsə xoş olar. Bəzi şirkətlər var ki, hər il bu maaşı verir, bəzilərinin təcrübəsində isə buna rast gəlinmir. Bəs 13-cü maaş verilməlidirmi?

HR Hunter şirkətinin qurucusu, İnsan Resursları üzrə konsultant İlkin Mirzəzadə Valyuta.az-a bu barədə danışdı. Onun sözlərinə görə, 13-cü maaş şirkətin həmin il əldə etdiyi mənfəətindən asılı olaraq verilə bilər:

“13-cü maaş, bonuslar, mükafatlar şirkətin mənfəətliyinə görə verilməlidir. Əgər şirkət normal qaydada işləyibsə, hər kəs işini ən yüksək səviyyədə görübsə, şirkət həqiqətən də ötən illərə nisbətən çox mənfəət qazanıbsa, ordan işçilərin də pay alması zəruridir. Hətta biznes etikasına uyğundur. Əgər bir idarəçi, sahibkar biznesinin böyüməyinə rəğmən heç bir şəkildə ordan işçilərə pay vermirsə, o biznesin böyüməsi bir səviyyəyə qədər, bir müddət davam edəcək. Yaxşı işçilər artıq ordan çıxmağa başlayacaq, biznesin çöküşü başlayacaq. Ona görə də, insan resursları qaydası da bunu deyir ki, işçinin bütün ehtiyaclarını qarşılamaq lazımdır”.

İlkin bəy bildirdi ki, əgər şirkətin mənfəəti aşağı olubsa, orada 13-cü maaşdan söhbət gedə bilməz:

“Buna Henri Ford çox gözəl bir münasibət bildirib, hələ də aktualdır. Deyir, biznesin nə qədər maaş verməlidir söhbəti yox, nə qədər maaş verə bilər söhbəti keçərlidir. Quyudan bəlirli bir miqdarda hər gün su çıxarsan, ondan hər gün su içmək olar. Amma daha artıq çıxartmağa başlasan, bir neçə gün sonra quruyacaq. Eləcə də bizneslərdə 13-cü maaş, bonus, mükafatlar şirkətin mənfəətliyinə əsasən verilməlidir. Əgər şirkət qazanmayıbsa, heç kəs yaxşı işləməyibsə, təbii ki, burada heç bir şəkildə 13-cü maaş söhbəti açıla bilməz”.

Nuray