Xarici ölkələrə səfər etmək üçün hər kəs daha ucuz başa gələcək üsulları yoxlayır. Turizmdə ən sərfəli üsul erkən rezervasiyadır. Bilet alıb özün səfər edəcəksənsə, gərək biletləri uzun müddət öncə alasan. Əgər tur şirkətləri vasitəsilə gedəcəksənsə, onlar da erkən rezervasiyanı endirimli qiymətlərlə təklif edirlər. Son vaxtlar tur şirkətlərinin yay ayları üçün erkən rezervasiyalı müxtəlif endirimli təkliflərini görürük. Müxtəlif ölkələrə endirimli təkliflərlə çıxış edirlər. Lakin erkən rezervasiya üçün 30-40-50 faiz ödəniş istənilir. O ödənişi edəkmi? 

Ümumiyyətlə, tur şirkətləri vasitəsilə etdiyimiz erkən rezervasiyaların hər hansı riski varmı?

Turizm eksperti Ceyhun Aşurov Valyuta.az-a bu barədə danışdı. Onun sözlərinə görə, səyahət etmək istəyirsinizsə, öncədən tur paketi almaq sizin xeyrinizə olacaq:
“Əslində öncədən tur paketlərini aldıqda qiymət daha qənaətcil olur. Turizmin pik vaxtı həmin paketləri alanda doğrudan da qiymətlərdə bəzən 40 faizə qədər, bəzən daha çox fərq yarana bilər. Ona görə, daim insanlar çalışır ki, öz tətillərini öncədən planlasınlar. Bu plana uyğun da tur paketlərini öncədən alsınlar ki, daha ucuz başa gəlsin”.

Ceyhun bəy bildirir ki, 2024-cü ilin yayında qiymətlərin bu ilki qiymətlərdən daha baha olacağı gözlənilir: 

“Dünyadakı vəziyyətlə əlaqədar olaraq bir çox şirkətlərdə tur paketlərinin qiymətləri qalxıb. Türkiyədə də bildirilir ki, gələn ilin yayında qiymətlər bu ilin yayından 10-15% faiz daha baha olacağı gözlənilir. Ona görə də, belə hallara qarşı öncədən almaq daha əlverişlidir”.

C.Aşurov tur paketlərini öncədən almağın riskli tərəflərindən də danışdı:

“Tur paketlərini öncədən almaq riskli ola bilər. Əgər gözlənilməz hansısa hadisə baş verərsə, ciddi böhran olarsa, tur ləğv edilə bilər. İstənilən halda düşünürəm ki, ödədiyiniz pul batmır, hansısa şəkildə kompensasiya olunur. Ola bilər ki, onu pul olaraq geri ala bilməsinlər, amma hansısa şəkildə sonra istifadə edə bilərlər”. 

Ceyhun bəy onu da qeyd etdi ki, riskləri azaltmaq üçün tur paketi aldığınız şirkətləri yaxşı araşdırmalısınız. Çünki tələbat çoxaldıqca, bu işdə də fırıldaqçılar çoxalır: 

“Ümumiyyətlə, “İnstagram” kimi sosial şəbəkələrdə həddindən artıq endirimli iqymətlərə aldanmaq olmaz. Yaxşı olar ki, güvənli bir şirkətdən alın və ya eyni bir turu 2-3 mənbədən yoxlayasanız. Kəskin fərq olarsa, burada artıq şübhələr var. Öncədən rezervasiya hər zaman daha qənaətlidir, amma kəskin ucuz qiymət şübhə yarada bilər. Ona görə də, turizm reyestrində adı olan, ofisi olan şirkətləri araşdırıb seçin. Tur paketlərini alarkən qarşılığında çek almağınız, müqavilə bağlamağınız tövsiyə olunur”. 

Nuray