“Samsung” şirkəti süni intellektə (Al) əsaslanan yeni funksiyaları özündə əks etdirəcək “One UI 6.1” mikroproqramını buraxmağa fəal şəkildə hazırlaşır. 

Valyuta.az "Android Authority" portalına istinadən xəbər verir ki, bəzi funksiyaları təsdiqləyən skrinşotlar artıq internetə sızıb.

Jurnalistlərin diqqət çəkdiyi ilk şey neyron şəbəkələrdən istifadə edərək divar kağızı yaratmaq imkanı olub. Oxşar funksiya əvvəllər "Google Pixel 8" seriyalı smartfonlar üçün də təqdim edilib. Beləliklə, istifadəçilər mətn sorğularını daxil etməklə divar kağızı yaratmaq üçün parametrlər təyin edə biləcəklər, bundan sonra süni intellekt göstərilən üstünlüklər əsasında təsvir yaradacaq.

"Samsung" smartfonlarında süni intellekt funksiyaları ilə təkmilləşdirilmiş foto redaktoru da olacaq. İstifadəçilər obyektləri bir təsvirdən digərinə köçürə və ya fotoşəkilin sərhədlərini genişlədə biləcəklər.

Qeydlər proqramında uzun mətn daxiletmələrini ümumiləşdirə bilən funksiya olacaq. Eyni zamanda, smartfonlarda real vaxt rejimində səsli zənglərin tərcüməsi, səs keyfiyyətinin yaxşılaşdırılması və optimallaşdırılmış batareyanın doldurulması funksiyası olacaq.

Qeyd olunur ki, hazırda "Samsung Galaxy S23" üçün "One UI 6.1"in beta sınağı aparılır. Bu cihazlar və yeni "Galaxy S24" 2024-cü ilin əvvəlində yeni proqram təminatı versiyasını alan ilk cihazlar arasında olacaq.

Paşa Məmmədli