NASA-nın oktyabr ayında kosmosa göndərdiyi "Psyche" kosmik gəmisi dekabrın 4-də kameralarını işə salıb və ilk görüntüsünü çəkib.

Valyuta.az xəbər verir ki, bu, kosmik gəmi üçün "ilk işıq" adı verilən bir mərhələdir. Hazırda Yerdən 126 milyon kilometr uzaqda olan kosmik gəmi 2029-cu ildə hədəfinə çatacaq. Gəminin tədqiq etmək üçün nəzərdə tutulan hədəfi qiymətli metallarla dolu olduğu iddia edilən "16 Psyche" adlı asteroiddir. Tədqiq edəcəyi asteroidin adını daşıyan "Psyche" kosmik gəmisi bu səyahətdə təxminən 3,5 milyard kilometr yol qət edəcək. Lakin nəqliyyat vasitəsi artıq bir sıra cihazlarını sınaqdan keçirir ki, bunlara kameralar daxildir. Kosmik gəmi tərəfindən qeydə alınan ilk görüntü kameraların nəzərdə tutulduğu kimi işlədiyinə əmin olmaq üçün sınaq xarakteri daşıyıb. Bir cüt eyni kameradan ibarət görüntüləmə cihazı bu sınaq çərçivəsində cəmi 68 şəkil çəkib. 

Gəmini kosmosa göndərən komanda "Psyche" asteroidinin tərkibini müəyyənləşdirmək üçün insan gözü ilə görünən və görünməyən işığın dalğa uzunluqlarında çəkilmiş fotoşəkillərdən istifadə edəcək. Görüntüləmə qrupu asteroidin geoloji quruluşunu daha yaxşı başa düşmək üçün üçölçülü xəritələr də yaradacaq.

Hazırda ən bahalı asteroid olan "Psyche", silikat süxurlarının əmələ gətirdiyi digər kosmik obyektlərdən fərqli, dəmir və nikel kimi qiymətli metallardan ibarətdir. Hətta meteoritin 60 faizinin metaldan ibarət olduğu təxmin edilir. Bu səbəbdən bəzi elm adamları "Psyche"nin 10 kvintilyon dollar dəyərində olduğunu iddia ediblər. Bununla belə, meteoritin gözlənildiyi qədər dəyəri olmaya biləcəyi ehtimalı da qalır. Məsələn, ABŞ-ın Purdue və Braun universitetlərindən olan tədqiqatçılar asteroiddəki dəmir tərkibin düşünüldüyü qədər yüksək olmadığını və buna görə də onun dəyərinin daha az ola biləcəyini iddia edirlər. Bu sirri çözmək üçün kosmik gəmi sözügedən meteoritə daha yaxından "baxmalıdır".

"Psyche" təxminən 225 kilometr diametrdədir. Səthi təxminən 165 min 800 kvadrat kilometrdir.

Elmir