ABŞ-ın aparıcı qəzetlərindən olan "New York Times" (NYT) Çinli zənginlərin ölkənin iqtisadi və siyasi gələcəyindən narahat olaraq investisiyalarını xaricə köçürdüklərini yazıb.

Valyuta.az xəbər verir ki, Yaponiyada yerləşən onlayn daşınmaz əmlak platforması "Shenjumiaosuan"ın meneceri Zao Ji paytaxt Tokioda dəyəri üç milyon dollar və ya daha çox olan dəbdəbəli mənzillərin əksəriyyətinin zəngin Çinlilər tərəfindən alındığını bildirib. İnvestorların bu məbləğləri nağd pulla dolu çamadanlarla ödədiklərini ifadə edən Ji, pandemiyadan əvvəlki dövrdə Çinlilərin ümumilikdə 300 min dollar və daha aşağı qiymətə studiya mənzillərə üstünlük verdiyinə diqqət yönəldib.

"New York Times"in paylaşdığı rəqəmlərə görə, Çindəki zəngin ailələr və özəl sektor şirkətləri bu il hər ay xaricə təxminən 50 milyard dollar sərmayə qoyub. Digər tərəfdən xəbərdə Pekin rəhbərliyinin xaricdə otel və ya ofis binası alınması kimi sərmayələrə icazə vermədiyi, bu səbəbdən zənginlərin müxtəlif üsullarla xarici ölkələrə pul köçürdüyü qeyd olunub. Bu üsullardan biri də külçə qızıl alıb xaricə göndərməkdir. Xəbərdə külçə qızıla tələbatın artması ilə əlaqədar Çində banklar arasında qızıl satış rəqabətinin başladığı da qeyd edilib.

İstifadə olunan digər üsul Çinin Honq-Konq Xüsusi İnzibati Bölgəsindəki banklarda hesablar açmaq və onlar vasitəsilə xaricdə müxtəlif sığorta məhsullarına investisiya qoymaqdır. Honq Konq administrasiyasının məlumatlarına görə, bu ilin birinci yarısında 2019-cu ilin eyni dövrü ilə müqayisədə Çindən olan investorlara satılan sığorta kağızlarında 21,3 faiz artım olub. Ekspertlər Çindən xaricə sürətli pul axınının ölkənin 17 trilyon dollarlıq iqtisadiyyatı üçün yaxın perspektivdə risk yaratmadığını bildiriblər.

Bununla belə, xaricə intensiv pul axınının davam etməsinin Çində uzunmüddətli perspektivdə maliyyə problemlərinə səbəb ola biləcəyinə diqqət çəkib. Xəbərdə 2015-ci ildə Çində birjanın çökməsindən sonra ölkədən külli miqdarda pul çıxarıldığı, Çin Mərkəzi Bankının valyuta ehtiyatlarından hər ay 100 milyard dollara yaxın vəsait xərclədiyi xatırladılıb. 

Sentyabrda yuan ABŞ dolları qarşısında son 16 ilin ən aşağı səviyyəsinə düşüb.

Elmir