Bu ilin III rübündə Azərbaycanda 18 bankın biznes kreditləri artdığı halda 8 bankda (Ləğv prosesində olan “Muğan Bank” daxil olmaqla) azalma müşahidə edilib.  

Valyuta.az xəbər verir ki, ölkənin əsas iri bankları - “PAŞA Bank” (106,5 mln. AZN), ABB (106,1 mln. AZN) və “Kapital Bank” (101,3 mln. AZN) son 3 ayda biznes kreditlərini 100 milyon manatdan çox artırıb. Müvafiq olaraq sözügedən bankların biznes kredit portfelləri 2,5 mlrd. manat, 2,1 mlrd. manat və 1,23 mlrd. manat təşkil edib. İlk beşlikdə yer alan “AccessBank”ın biznes kredit portfeli 2023-cü ilin II rübü ilə müqayisədə III rübdə 41,9 milyon manat artaraq 752,7 milyon manata, “Xalq Bank”ın kredit portfeli isə 41,8 milyon manat artaraq 1,26 mlrd. manata çatıb. 

Son 3 ayda biznes kreditləri ən çox azalan bank isə “Premium Bank” olub. Bankın biznes kreditləri 40 milyon manat azalaraq 428,6 milyon manatdan 388,6 milyon manata enib. 

Yenicə lisenziyası ləğv edilən “Muğan Bank” bundan əvvəl biznes kredit portfelini 5,3 milyon manat azaldaraq 264,3 milyon manata, “Naxçıvan Bank” 5 milyon manat azaldaraq 105,3 milyon manata, “Bank of Baku” 4,5 milyon manat azaldaraq 157,8 milyon manata, “Yapı Kredi Bank Azərbaycan” 4,1 milyon manat azaldaraq 166,9 milyon manata endirib. Bu dövrdə “AFB Bank”ın biznes kreditlərində 2 milyon manat, “Azər Türk Bank”da  0,9 milyon manat, Bank Melli İran Bakı filialında 40 min manat azalma müşahidə edilib.

Mahir