Yaponiyada tədqiqatçılar tərəfindən batareya texnologiyasında böyük bir irəliləyiş əldə edilməsi yeni nəsil cihazların nəhayət kütləvi istehsala keçməsinə yol aça bilər.

Valyuta.az xəbər verir ki, Tokio Elm Universitetində bir qrup araşdırmaçı ənənəvi litium-ion batareyalarına ekvivalent performansa malik natrium-ion batareyaları istehsal etməyin yolunu tapıb.

Litium-ion batareyalar, elektrik avtomobillərindən tutmuş smartfonlara qədər hər şeydə istifadə olunur, lakin onlar çətin və bahalı olan mənbələrdən istehsal edilir. Onların tərkibində zəhərli və tez alışan maye elektrolitlər də var. Bunun əksinə, natrium-ion batareyaları daha ucuzdur, həddindən artıq temperaturlara qarşı sabitlik təklif edir və istiləşmə riski yaratmır. İndiyə qədər onun əsas məhdudiyyəti litium-ion batareyaları ilə müqayisədə daha aşağı enerji sıxlığı olub. Bu məhdudiyyəti aradan qaldırmaq üçün elm adamları nanostrukturlu sərt karbondan hazırlanmış yüksək tutumlu elektrod istehsal edib və onu optimallaşdırmaqla həqiqi batareyaya inteqrasiyasını həyata keçirib. 

Tədqiqatçılar bildiriblər ki, yeni elektrodlar inanılmaz performans göstərməklə istehlakçı elektronikası və elektrik avtomobilləri üçün yeni nəsil akkumulyatorların istehsalında əlverişli variant təklif edir. Bu ixtira natrium-ion batareyalarını günəş və külək elektrik stansiyaları üçün aşağı karbon izi olan enerji saxlama sistemləri kimi digər praktik tətbiqlər üçün də uyğunlaşdıra bilər.

Tədqiqat "Advanced Energy Materials" akademik jurnalında dərc olunan "Na- və K-ion batareyaları üçün anomal olaraq böyük tutumlu sərt karbonun yeni şablon sintezi" adlı araşdırmada ətraflı təsvir edilib.

Elmir