İqtisadiyyat Nazirliyi yanında Dövlət Vergi Xidməti 2022-ci il üzrə dövlət müəssisələrindən 145 milyon manata yaxın vergi borcunu ala bilməyib. 

Valyuta.az-ın məlumatına görə, bu barədə Hesablama Palatasının 2022-ci ilin dövlət büdcəsinin icrasına dair illik hesabatında bildirilib.

Məlumata görə, dövlət müəssisələri üzrə ümumilikdə 2022-ci ildə 4 mlrd. 250 mln.manat vergi ödəmələri hesablanıb.

Bunun əvəzində isə büdcəyə ödəmələr 4 mlrd. 105,4 mln. manat təşkil edib.
Başqa sözlə, dövlət müəssisələri tərəfindən 144,5 mln. manat vergi büdcəyə ödənilməyib. 

Məsələn, "Azerenerji" ötən il üzrə hesablanmış 56,5 milyon manat vergi ödəməsi qarşılığında büdcəyə 49,8 milyon manat, yəni 6,7 milyon manat az ödəyib. 

"Azərsu" 50,6 milyon manat qarşılığında 50,1 milyon manat, "Azərişıq" 60,4 milyon manata qarşı 58,6 milyon manat, "Bakı Metropoliteni" 9,6 milyon manat qarşılığında 7,4 milyon manat, "Bakı Beynəlxalq Dəniz Ticarət Limanı" isə 5,4 milyon hesablanmış vergi borcu əvəzinə 4,3 milyon manat vəsait ödəyib. 

Vergi eksperti Vəli Əliyev isə bildirir ki, AZAL-ın və SOCAR-ın artıq ödəməsi ümumi məbləğə təsir edib. Ona görə də yığılmayan vergi məbləği ümumilikdə 955,4 milyon manata çatıb. 

O qeyd edib ki, DVX vergi borcunu ödəməyən dövlət müəssisələri qarşısında heç bir addım atmayıb.

Mahir