ABŞ və Avropa İttifaqı səlahiyyətliləri kritik mineral ehtiyatlara çıxışı təmin etməli olan Afrika enerji dəhlizinin inkişafına dair memorandum imzalayacaqlar. 

Valyuta.az xəbər verir ki, bu barədə "Bloomberg" vəziyyətlə tanış olan mənbələrə istinadən yazır.

Onların sözlərinə görə, infrastruktur layihəsi "Global Gateway" adlanır, onun ümumi dəyəri 317 milyard dollardır. Həmsöhbətlər agentliyə bildiriblər ki, dəhliz Anqolanın Lobito limanı vasitəsilə Zambiyanın şimal-qərb bölgələrini və Konqo Demokratik Respublikasının cənub hissəsini qlobal enerji bazarları ilə birləşdirməyə kömək edəcək. Planlara əsasən, ilk olaraq Zambiya və Anqola arasında dəmir yolu genişləndiriləcək.

Mənbələrin bildirdiyinə görə, yeni təşəbbüs Afrikadakı əsas resurslara çıxış üçün Qərb bloku ilə Çin arasında artan rəqabətlə bağlıdır. Çinin qitədəki təsirini məhdudlaşdırmaq üçün Qərb ölkələri Moldova, Banqladeş, Mavritaniya və Qazaxıstan da daxil olmaqla tərəfdaşlarla 30 müqavilə imzalamağa hazırlaşır.

"Bloomberg"in məlumatına görə, Avropa hakimiyyəti hazırda Avropa Yenidənqurma və İnkişaf Bankı, Avropa İnvestisiya Bankı və özəl biznesdən maliyyə cəlb etməklə məşğuldur. Layihə müəlliflərinin fikrincə, onun həyata keçirilməsi üçüncü ölkələrin Afrikanın enerji resurslarına çıxışını asanlaşdıracaq. Agentlik belə qənaətə gəlir ki, yeni dəhliz on il ərzində 1 trilyon dollarlıq investisiya cəlb edən Çinin “Bir kəmər, bir yol” layihəsinə rəqib olmalıdır.

Afrikanın müxtəlif çeşidli mineral ehtiyatları var ki, onların çoxu dünyanın ən zəngin yataqları hesab olunur. Qitədə böyük neft, kömür, qara və xüsusilə əlvan metal filizləri (dəmir, manqan, mis, sink, qalay, xromit), nadir metallar və uran filizləri, həmçinin boksit ehtiyatları mövcuddur.  Qeyri-metal minerallardan fosforitlər və qrafit yataqları ən qiymətlidir.

Paşa Məmmədli