ABŞ-da avtomobil işçiləri 4 günlük iş və daha çox qazanc üçün etiraz məqsədilə tətilə çıxıb. 

Valyuta.az xəbər verir ki, ABŞ-da avtomobil işçiləri etiraz aksiyalarını davam etdirərkən, sektorun nəhənglərindən olan "General Motors" (GM) həftədə 200 milyon dollar itki ola biləcəyini bildirdi . Birləşmiş Avtomobil İşçiləri Həmkarlar İttifaqının (UAW) verdiyi açıqlamada, GM-in Texas ştatının Arlington şəhərindəki fabrikində tətilə daha 5 min işçinin qatıldığı açıqlanıb. Fabrikdə "Chevy Tahoe", "GMC Yukon" və "Cadillac Escalade" kimi yuxarı seqmentli vasitələrin istehsal edildiyinə diqqət çəkilib, şirkətin ən çox gəlir gətirən müəssisəsinin işçilərinin işdən ayrıldığı qeyd olunub.

Beləliklə, UAW-nin sentyabrın 15-də başlatdığı, "Ford" və "Stellantis" şirkətləri ilə yanaşı GM-a da zərbə vuran tətildə iştirak edən işçilərin sayı 45 minə yüksəlib. Böyük Britaniyanın ictimai yayımçısı BBC-nin məlumatına görə, birliyin tarixində ilk dəfə olaraq eyni dövrdə hər üç avtomobil nəhəngində iş dayanıb. UAW-nin açıqlamasında, “Detroit Üçlüyü” kimi tanınan avtomobil nəhənglərinin bu ilin ilk yarısında cəmi 21 milyard dollar mənfəət əldə etdiyi bildirilib. Həmkarlar ittifaqı isə buna baxmayaraq avtomobil şirkətlərinin qazandıqları gəlirdən işçilərə ədalətli pay verəcək müqavilələri qəbul etmədiyini bildirib. 

GM tərəfindən edilən açıqlamada tətilin genişləndirilməsi "lazımsız və məsuliyyətsiz" olaraq xarakterizə edilib və aşağıdakı ifadələrə yer verilib: "Bu, öz dolanışıqlarını qurban verən komandamızın üzvləri üçün zərərlidir. Həmçinin dilerlərimizə, təchizatçılarımıza, bizə güvənənlərə mənfi təsir göstərir. İndi bu prosesə son qoymaq vaxtıdır". Açıqlamada şirkətin tətil başlayandan bəri artıq 800 milyon dollar itirdiyi, sonrakı dövrdə isə həftədə 200 milyon dollar zərər gözlənildiyi bildirilib.

UAW-nin "Ford", GM və "Stellantis"lə apardığı danışıqlarda təxminən 150 min işçinin yeni müqaviləsi üçün razılıq əldə oluna bilməyib. Bu səbəbdən UAW üzvü olan işçilər də tətilə çıxmaq qərarına gəliblər. Bu vaxta qədər birlik tətili genişləndirərək 22 ştatda 8 montaj zavodu və 38 hissə paylanması mərkəzini əhatə edib.

Elmir