Silikon Vadisində elm dünyasının sərhədlərini zorlayan və itlərin ömrünü uzatmağı hədəfləyən yeni bir araşdırmaya başlanılıb. Biotexnologiya şirkəti “Loyal”, itlərin ömrünü uzada bilən tablet şəklində olan dərmanın klinik sınaqlarına başlandığını açıqlayıb.

Mütəxəssislər bu tədqiqatının sevimli dostlarımızın ömrünü uzatmaq potensialına malik olduğunu düşünürlər.

Kompleks layihə ilkin olaraq yaşlı bir it üzərində həyata keçiriləcək. ABŞ-da baytarlıq klinikaları vasitəsilə aparılacaq bu dörd illik tədqiqatın 2023-cü ilin sonunda başlaması planlaşdırılır. 10 yaşdan yuxarı iştirakçı itlər üzərində aparılacaq təcrübənin baytarlıq sahəsində indiyə qədər aparılan ən əhatəli araşdırmalardan biri olduğu bildirilir.

“Loyal”ın baytarlıq direktoru Dr. Brennen McKenzie bu layihənin təkcə itlərin ömrünü uzatmaq deyil, həm də onların sağlam və xoşbəxt həyat sürmələrini təmin etmək məqsədi daşıdığını vurğulayıb. 

Ümid olunur ki, bu innovativ təşəbbüs təkcə ev heyvanları aləminə deyil, həm də insan sağlamlığına müsbət təsir göstərəcək. İtlər bir çox bioloji və ətraf mühit faktorlarına görə insanlara bənzədiyindən, nəticələrin insan təbabətinə də təsiri ola bilər. Dr. McKenzie, itlər üzərində aparılan araşdırmaların, xüsusilə xərçəng və idrak qabiliyyətinin zəifləməsi kimi sahələrdə insan sağlamlığı üçün müalicələrə işıq tuta biləcəyini ifadə etdi.

Ancaq dərmanın dəqiq tərkibi və fəaliyyəti haqqında məlumat hələ açıqlanmayıb. Kommersiya sirri kimi qorunan bu məlumat test nəticələrinə görə ictimaiyyətlə paylaşılacaq. Sınaq uğurlu olarsa, “Loyal” bu ömrü uzadan əlavəni ev heyvanları sahiblərinə təqdim etməyi planlaşdırır. Şirkət bildirir ki, bu dərman itlər üçün təhlükəsizdir və uzunmüddətli yan təsirləri ehtimalı azdır.
Dr. McKenzie, layihənin heyvan sağlamlığı sahəsində dönüş nöqtəsi olacağına ümid edir və yaxın illərdə itlərin ömrünü uzadan daha çox müalicə variantının ortaya çıxacağına inanır. Ümid olunur ki, bu təşəbbüs alimləri və ev heyvanları sahiblərini sevimli heyvanlarının daha sağlam və dolğun həyat sürməsinə kömək etmək üçün yeni üfüqlərə aparacaq.

Nuray