“Dövlət Statistika Komitəsinin Azərbaycan büdcəsində 218,5 milyon manat kəsr olduğu ilə bağlı yaydığı statistik məlumatlar heç bir narahatlıq yaratmır”. 

Bu sözləri Valyuta.az-a iqtisadçı Xalid Kərimli ölkə büdcəsi ilə bağlı açıqlanan statistik məlumatları şərh edərkən deyib.

İqtisadçı qeyd edib ki, Azərbaycanda həm 2023-ci ilin əvvəlindəki büdcəsində, həm iyun ayında büdcəyə edilən əlavələrdə də büdcənin gəlir-xərc hissəsi artırıldı:

“Həmin rəqəmlərə görə ölkəni 3 milyard 116,5 milyon manat kəsrli büdcə gözləyir. Bu baxımdan büdcədə keçən il profisit, bu il isə kəsr olması iə bağlı narahat olmamalıyıq. Bu il təhlükəsizlik, Qarabağın bərpası ilə əlaqəli olan layihələr sürətlə icra olunur. Buna görə də 218,5 milyon manat büdcə çərçivəsində nəzarət olunan rəqəmdir”.

Xalid Kərimli deyir ki, keçən ilə görə bu il xərclərin artmasının da bir neçə səbəbi var:

“Minimum əmək haqlarının, pensiyaların, sosial xərclərin artması, milli təhlükəsizliklə, ordunun saxlanması, Qarabağ və Şərqi Zəngəzurun bərpası ilə bağlı məsələlərə görə büdcə xərci artıb”. 

“Büdcə kəsiri necə aradan qaldırıla bilər” sualına cavab verən iqtisadçı bildirib ki, bunu etmək üçün bir məqsəd yoxdur:

“Bu kəsr Azərbaycan iqtisadiyyatı üçün heç bir problem yaratmır. Maliyyə Nazirliyi 2024-cü ilin büdcə layihəsində 2023-cü ilin ilk yarısının icmal büdcəsi haqqında da məlumat verib. Bu büdəcəyə görə Azərbaycanın icmal büdcəsində ilk 6 ayda 11 milyard manat profisit olub. Bu profisit isə neft fondunda toplaşır. Dövlət də ehtiyatlarımız olduğu üçün rahatdır. İcmal büdcənin profisiti də kifayət qədərdir. Yəni 2023-cü ilin yarısında icmal büdcəsinin gəlirləri 26.7 milyard manat olub ki, bu da keçən illə müqayisədə 48 faizə qədər çoxdur. Kifayət qədər gəlirlərimiz artıb. İcmal büdcənin bu büdcədən fərqi isə ondan ibarətdir ki, büdcədə əsas rəqəmləri formalaşdıran neft fondunun gəlirləri də öz əksini tapmasıdır”.

Qeyd edək ki, ölkəmiz gələn il 2 milyard manata yaxın borc alacaq. Bu ilin ilk 8 ayında büdcənin xərcləri isə 13,8% artaraq 20 milyard 649,7 min manata yüksəlib və büdcədə 218,5 milyon manat kəsir yaranıb.  

Xatırladaq ki, ötən ilin eyni dövründə büdcədə 2 milyard 32,9 milyon manat profisit olub.

Davud