“Manata hər hansı bir təhdid gözlənilmir”.

Bu fikirləri Valyuta.az-a iqtisadçı Eldəniz Əmirov “ABŞ-ın dövlət borcunun rekord həddə çatması, bununla Federal Ehtiyatlar Bürosunun dövriyyə daha çox dollar buraxması ehtimalı, Türkiyənin Mərkəzi Bankının uçot dərəcəsini qaldırması kimi dünyada baş verən iqtisadi proseslərin fonunda manatı nə gözləyir" sualını şərh edərkən səsləndirib.

Eldəniz Əmirov qeyd edib ki, ABŞ uzun müddətdir dünyanın ən çox borc alan dövlətidir, hələ bir müddət də belə davam edəcək:

“Bu, ABŞ üçün heç bir təhdid yaratmır. Ona görə ki, bu borcları Amerikadan istəmək iqtidarında olan, bunu tələb şəklində qoyan elə bir güc yoxdur. O ki qaldı Türkiyəyə, təbii ki, qardaş ölkənin həm borcu, həm milli valyutasına olan təzyiq, həm inflyasiya iqtisadiyyatı üçün ciddi təhdidlər yaradır. Ona görə də uçot dərəcəsini artırmaqla Türkiyə müəyyən qədər inflyasiyanı cilovlamağa, iqtisadi aktivliyin müəyyən problemlərini həll etməyə çalışır və bu səbəbdən sərt monetar siyasət həyata keçirir”. 

İqtisadçı deyib ki, Azərbaycanda vəziyyə bir az fərqlidir:

“Ölkədə manatın müdafiəçisi kimi çıxış edən bir neçə mərkəzi icra hakimiyyəti orqanı qrum var. Bunlardan da birincisi kimi Mərkəzi Bank çıxış edir. Mərkəzi Bank ölkədə makro iqtisadi tarazlığın qorunub saxlanılması üçün manatın məzənnə stabilliyinə üstünlük verir. Manat ABŞ, Rusiya Türkiyə və s. ölkələrdə olduğu kimi iqtisadi metodlarla deyil, inzibati metodlarla tənzimlənir. Sadə dillə ifadə etsək, manatın məzənnəsi Mərkəzi Bank tərəfindən konkret olaraq müəyyən edilir, yəni onu bazar tənzimləmir. Buna görə də manata hər hansısa bir təzyiq, problem yoxdur. Böyük ehtimalla il sonuna qədər bu məzənnə sabit qalacaq”.

Bəs bu əminliyi yaradan nədir?

"Bu əminliyi yaradan ölkənin mövcud valyuta ehtiyatları, neftin hazırkı qiyməti manata olan təzyiqi asanlıqla aradan qaldırmağa imkan verir. Ümumiyyətlə xarici mühitin kifayət qədər yaxşı olması Mərkəzi Banka valyuta bazarında da tarazlığı qorumağa imkan verir. Mərkəzi Bankın keçirdiyi hərracların 99 fizində təklif çox, tələb az olub. Yəni Mərkəzi Bank sadə dil ilə ifadə etsək, tələbdən daha artıq dollar sata bilir. Ona görə də Mərkəzi Bankın fəaliyyətində alış yönlü istiqamət daha çoxdur".

Davud