İnformasiya Texnologiyaları (İT) inkişaf edir, zamanla bu sahədə çalışanların, bu sektora maraq göstərənlərin sayı artır. Eyni zamanda, belə fikirlər də var ki, süni intellekt müəyyən İT sahələrində insanı tam əvəz edəcək. Bu, baş verəcəkmi?

İT üzrə mütəxəssis Elvin Həsənov Valyuta.az-a açıqlamasında bildirdi ki, süni intellekt bir çox İT sahəsində istifadə olunur: “Süni intellekt informasiya texnologiyalarının əsasən proqramlaşdırma, data analitika, kibertəhlükəsizlik, robotexnika, maşın öyrənməsi (Machine learning), monitorinq və s. bölmələrində istifadə olunur. İT-nin robotexnika və maşın öyrənmə bölmələrini demək olar ki, süni intellekt əvəz edib.  Monitorinq bölməsinin isə 95 faizində süni intellektdən istifadə olunur”.

Müsahib bu bölmələrdə süni intellektin rolundan da danışdı: “Robotexnikada süni intellektdən istifadə intellektual robotların yaradılmasıa və süni intellekt elminin yeni bir sahəsinin ərsəyə gəlməsinə səbəb olub. Maşın öyrənmədə isə misal olaraq bulud sistemində “chat-bot”ları (söhbət robotu) qeyd etmək olar. Biz “chat-bot”dan səsli və ya yazılı nə isə soruşduğumuz zaman o, avtomatik olaraq süni intellekt sayəsində müxtəlif cavabları ekrana çıxarır. Bu sahə demək olar ki, tamamilə süni intellekt vasitəsilə işləyir. Monitorinq bölməsi isə sistem və şəbəkədə süni intellekt vasitəsilə xətaların üzə çıxarılması üçün istifadə olunur. Burada son mərhələdə 5 faizlik insan faktoruna ehtiyac var. Zamanla süni intellekt sayəsində bu bölmədə də insan faktoruna ehtiyac qalmayacaq. Data analitika sahəsi də həmçinin, texnologiya, süni intellekt inkişaf etdikcə, müəyyən hissələrini süni intellekt əvəz edəcək”.

Müsahib bildirdi ki, müəyyən İT sahələrinə hər zaman tələb olacaq: “Süni intellekt sahəsi getdikcə inkişaf edir. Demək olar ki, bütün sahələrdə süni intellekt öz sözünü deyir. Buna görə süni intellekt sahəsinə getdikcə tələb artmaqdadır. Böyük şirkətlər bu sahənin inkişafında maraqlıdır və bunun üçün külli miqdarda vəsait xərcləyirlər. Gələcəkdə bu sahədə kadrlara hər zaman tələb olacaq. Eyni zamanda proqramlaşdırma və kibertəhlükəsizlik sahəsində insan faktorunun olması mütləqdir. Bu sahələrdə də fəaliyyət göstərən insanlara hər zaman tələb olacaq. Çünki burada bəzi məsələlərdə insan qərar verməlidir”.

Qarakişi Vəlizadə