Azərbaycan Mərkəzi Bankının məlumatına görə, bu ilin yanvar-avqust aylarında qurumun valyuta bazarına müdaxiləsi 122 milyon ABŞ dolları olmaqla alışyönlü olub. Məlumata görə, 8 ay ərzində AMB-də keçirilmiş valyuta hərraclarının 99 %-də təklif tələbi üstələyib.

Xatırladaq ki, 2023-cü ilin yanvar-avqust aylarında AMB-nin Dövlət Neft Fondu (ARDNF) ilə birlikdə keçirdiyi valyuta hərraclarında 2 milyard 295,8 milyon ABŞ dolları məbləğində satış olub. Bu, ötən ilin eyni dövrü ilə müqayisədə 32,3 % azdır.

İqtisadçı ekspert Fuad İbrahimov Valyuta.az-a açıqlamasında bildirib ki, valyuta hərraclarının 99 faizində təklifin tələbi üstələməsi prosesin daha çox qeyri-rəsmi formatda keçirilməsinin nəticəsidir:

“Ona görə də belə bir mənzərə formalaşır. Hamıya bəllidir ki, hazırda banklarda müəyyən məhdudiyyətlər var. Vətəndaş bankdan aldığı 10 min dollar vəsaiti müəyyən çərçivə daxilində alır. Eyni zamanda, Azərbaycanda idxal amili güclüdür. Ölkəmizə kifayət qədər idxal malları daxil olur. Onun alqı-satqısı da valyutaya ciddi ehtiyac yaradır. Hərraclarda təklif tələbi ona görə üstələyir ki, rəsmi tələb çıxış edə bilmir. Tələbin müəyyən çərçivəsi var. Ona görə də ölkədə qara bazar açıq-aşkar fəaliyyət göstərir”. 

Ramiz