“Ölkədə hər ay mütəmadi olaraq 40-50 milyon manat məbləğində ipoteka portfelinin böyüməsi prosesi gedir”.

Bunu Valyuta.az-a açıqlamasında iqtisadçı ekspert Xalid Kərimli banklar tərəfindən verilmiş ipoteka kreditlərinin aylıq həcmlərində azalma hallarının davam etməsi ilə bağlı statistikaya münasibət bildirərkən deyib. 

Ekspert qeyd edib ki, ipotekada aktivlik aşağı düşməyib: “Bu İpoteka Fondunun yaydığı aylar üzrə dinamik məlumatlardır. Biznes dövrü var. Vətəndaşlar istirahətdə olarkən iqtisadi aktivlik aşağıb düşüb. Bunun səbəblərdən biri budur. İkincisi, İpoteka Fondunun maliyyələşmə tezliyi də var. Fondun özü maliyyəni hansı aralıqla verirsə, banklar da həmin aralıqa paylaşdırır. Banklara İpoteka Fondunun ayırdığı limitlər var. Bu limitləri özlərinin aktiv dövründə əvvəldən aldıqları müraciətlərə əsasən paylaşdırırlar”. 

Xalid Kərimli bildirib ki, 31 dekbar 2022-ci ildə 2 milyard 985 milyon manatlıq ipoteka krediti var idisə, 31 iyul 2023-cü ildə bu rəqəm 3 milyard 373 milyon olub: “Ondan əvvəlki ayda bu rəqəm 3 milyard 321 milyon manat olub. İyul ayında 53 milyonluq artım var, avqust ayında isə rəqəmlər hələ açıqlanmayıb. Bankların daha çox ipoteka krediti verdiyi görünür. Mərkəzi Bankın banklar statistikasından görünür ki, hər ay artım olur. Bu onu deməyə imkan verir ki, Azərbaycanda ipoteka krediti bazarında fəallıq aşağı düşməyib, əksinə bankların bu portfeli böyüyə-böyüyə gedir. Bankların əlində ucuz pul var və şəxsi vəsaitlərini ipoteka kreditlərinə yönəltmək imkanlarına malikdirlər”.

Qeyd edək ki, banklar bu ilin mart ayında 68,6 milyon manat ipoteka kredit yerləşdirmişdilərsə, bu göstərici aprel ayında 53,9 milyon, may ayında 40,9 milyon, iyun ayında 37,8 milyon və iyul ayında 35,9 milyon manat olub. 

Aylin