“PAŞA Bank”ın Gürcüstan törəməsi “PAŞA Bank Georgia” bu ilk yarısı üzrə audit olunmuş maliyyə hesabatını açıqlayıb. 

Valyuta.az xəbər verir ki, bank ilin ilk yarısını 2,5 milyon lari (1,6 milyon manat) xalis zərərlə başa vurub. Bu isə ötən ilin eyni dövrünə nisbətən 2,7 dəfə azdır. Bank 2022-ci ilin ilk yarısı üzrə 6,5 milyon lari xalis zərər açıqlamışdı. 

Hesabata görə, bank bu ilin ilk altı ayında 26,6 milyon lari faiz gəliri əldə edib ki, bu da bir il əvvələ nisbətən 36,1% çoxdur. Bankın faiz xərcləri isə bu dövrdə 9,8 milyon lari (bir il əvvələ nisbətən 19,2% çox) təşkil edib. Faiz gəlirlərinin mütləq ifadədə faiz xərclərindən daha çox artması xalis faiz gəlirlərini 73,2% artıraraq 11,9 milyon lariyə çatdırıb.

Bankın qeyri-faiz gəlirləri isə ötən ilin eyni dövrünə nisbətən 53,3% artaraq 5,4 milyon lariyə çatıb. İşçi xərclərinin artması ümumilikdə bankın qeyri-faiz xərclərini 17,3% artırıb və 19,8 milyon lariyə yüksəldib. Bu isə bankı növbəti dəfə əməliyyat zərəri etməsinə təsir edib. 

Başqa sözlə, bank yarımili 2,5 milyon lari əməliyyat zərəri (xalis zərəri ilə eyni həcmdə) ilə bitirib. 

“PAŞA Bank”ın Gürcüstan törəməsi həmçinin, yerli bazarda rəqabətə də davam gətirə bilmir. Belə ki, törəmə bank ilin əvvəlinə nisbətən 2,5% kiçilib. Bu il iyulun 1-nə bankın aktivləri 12,7 milyon lari azalaraq 505,7 milyon lariyə enib. Bankın kredit portfeli isə (müştərilər verilmiş kreditlər) 28,3 milyon lari azalaraq 322,5 milyon lariyə enib. Bankın öhdəlikləri də 2,5% azalaraq 405,4 milyon lariyə bərabər olub.
 
 “PAŞA Bank Georgia”nın bölüşdürülməmiş zərərinin ilin əvvəlindəki 27,3 milyon laridən 2023-cü ilin ilk yarısında 29,8 milyon lariyə qədər artması onun cəmi kapitalını “yeyib”. Bankın cəmi kapitalı ilin əvvəlindən 2,4% azalaraq 100,3 milyon lariyə düşüb.  

Qeyd edək ki, Azərbaycan Mərkəzi Bankının avqustun 28-nə olan rəsmi məzənnəsinə əsasən 1 lari 0.6480 manat təşkil edir. 

Mahir