Qazaxıstan hakimiyyəti ölkədən mayeləşdirilmiş neft qazının ixracına müvəqqəti qadağa qoymağı planlaşdırır. 

Valyuta.az xəbər verir ki, bu barədə TASS Qazaxıstanın energetika naziri Almasadam Satkaliyevin ictimai müzakirə üçün dərc olunmuş müvafiq əmr layihəsinə istinadən məlumat yayıb.

“Qazaxıstan Respublikası ərazisindən mayeləşdirilmiş neft qazının və butanın üç il müddətinə avtomobil nəqliyyatı ilə, altı ay müddətinə dəmir yolu ilə ixracına qadağa qoyulsun”, deyə sənəddə bildirilir.

Qeyd olunur ki, qadağa Qazaxıstan Prezidenti tərəfindən təsdiq edilmiş hasilatın pay bölgüsü sazişi və ya yerin təkindən istifadə müqaviləsi əsasında hasil edən yer təki istifadəçilərinin mayeləşdirilmiş neft qazının ixracını əhatə etməyəcək.

Energetika Nazirliyi izah edib ki, sərəncam layihəsinin məqsədi daxili bazarı mayeləşdirilmiş neft qazı ilə təmin etməkdir. Onlar qeyd ediblər ki, bu il daxili bazarda həmin yanacağın istehlakı əvvəlki ilə müqayisədə 28 faiz artıb.

Paşa Məmmədli