Süni intellekt parolu klaviaturada basılan düymələrin səsləri ilə müəyyən edə bilir. Buna görə, məsələn, Zoom zəngi zamanı şəxsi məlumatlarınızı daxil etsəniz, haker hücumunun qurbanı ola bilərsiniz.

Valyuta.az xəbər verir ki, bu məlumatı ekspertlərə istinadən The Guardian öz materialında paylaşıb. Ekspertlər hesab edir ki, videokonfrans proqramlarının populyarlığının artması və quraşdırılmış mikrofonları olan cihazların hər yerdə olması ilə səslərin istifadəsinə əsaslanan kiberhücumların riski artır. Tədqiqatçılar bunu sübut etmək üçün süni intellekt aləti yaradıblar ki, o, klaviaturadakı düymələrin basılması səslərindən parolu 90% dəqiqliklə təxmin edir.

Surrey Universitetindən Dr. Esan Toreini və həmkarları Təhlükəsizlik və Məxfilik üzrə Avropa Simpoziumunda öz işlərini təqdim ediblər. Alimlər araşdırma zamanı MacBook Pro klaviaturasındakı 36 düymənin hər birinə 25 dəfə basdıqlarını bildiriblər. Bunu müxtəlif barmaqlarla ediblər və təzyiq qüvvəsini dəyişdiriblər. Səslər həm Zoom vasitəsilə, həm də noutbukdan qısa məsafədə yerləşən smartfonda qeydə alınıb.

Daha sonra məlumatlar süni intellekt alətinə yüklənib. Alqoritmlər akustik səsin xüsusiyyətlərini emal edib və düymələri tanımağı öyrənib. Təlim zamanı istifadə olunan süni intellektin nəyə səbəb olduğu tam aydın deyil. Bununla belə, Durham Universitetindən olan tədqiqatın müəlliflərindən biri Coşua Harrison hesab edir ki, klaviaturanın kənarına qədər olan məsafə düymələri müəyyən etmək üçün əsas ola bilər.

Alətin növbəti sınaqları göstərib ki, o, smartfonda və Zoom vasitəsilə səs yazılarından düymələri müvafiq olaraq 95 və 93% dəqiqliklə müəyyən edib. Təsvir edilən tədqiqat bu istiqamətdə ilk olmasa da, elm adamları ən müasir üsullardan istifadə ediblər və ən dəqiq göstəricilərə nail olublar. Mütəxəssislərin fikrincə, təhlillərin nəticələri ictimai yerlərdə və ya videokonfranslar zamanı şəxsi məlumatların daxil edilməsi zamanı mümkün qədər ayıq-sayıq olmağın zəruriliyini sübut edir. Onlar hərfi dəyişdirmək üçün Shift düyməsindən istifadə etməyi məsləhət görürlər. İnsanın onu nə vaxt buraxdığını müəyyən etmək AI üçün çətindir.

Nicat